गच्छदारको अध्यक्षमा उम्मेदवारी दर्ता

विराटनगर, २२ वैशाख । मधेसी जनअधिकार फोरम नेपाल (लोकतान्त्रिक)का अध्यक्षमा विजयकुमार गच्छदारले उम्मेदवारी दर्ता गराउनुभएको छ ।
सो पार्टीको विराटनगरमा जारी अधिवेशनको तेस्रो दिन आज १०ः३० बजे उहाँले अध्यक्षमा उम्मेदवारी दर्ता गराउनुभएको हो । उहाँका प्रस्तावक र समर्थकमा पाँच पाँच जना छन् । प्रस्तावकमा सो पार्टीका उपाध्यक्ष भारतेन्दु मल्लिक, धनुषा अध्यक्ष उमाशङ्कर अरगरिया, काभ्रे अध्यक्ष गोविन्दबहादुर थापा, नवलपरासी अध्यक्ष सुभाष गिरी र केन्द्रीय सदस्य (काठमाडाँैं) बाबुराम पोखरेल हुनुहुन्छ ।

त्यसैगरी समर्थकमा चितवन जिल्ला अध्यक्ष जोखाप्रसाद चौंधरी, काठमाडाँैं अध्यक्ष रुद्रप्रसाद श्रेष्ठ, मोरङ अध्यक्ष भक्तिनाथ माझी, सुनसरी अध्यक्ष प्रदीप चौंधरी र केन्द्रीय सदस्य महेशदत्त रहनुभएको छ ।

सो अवसरमा पार्टी अध्यक्ष गच्छदारले सर्वसम्मत अध्यक्षमा निर्वाचित हुने विश्वास व्यक्त गर्दै लोकतान्त्रिक विधिबाट हुने निर्वाचनमा केन्द्रीय सदस्यमा पनि सर्वसम्मतिको प्रयास हुने र नभएको अवस्थामा मतदान हुने जानकारी गराउनुभयो ।

सो पार्टीका ४२ केन्द्रीय सदस्य पदको निर्वाचन हुन लागेकामा समावेशीतर्फ २१ र खुलातर्फ २१ पदका लागि मनोनयनपत्र दर्ता भइसकेको छ । तीमध्ये आरक्षित पदमा मधेसीका चार, महिला, दलित (पहाडी), दलित (मधेसी), आदिवासी जनजाति (मधेसी) आदिवासी जनजाति (पहाडी), पिछडावर्ग र खसआर्यका लागि दुई दुई पद आरिक्षत गरिएको छ । एक पद कर्णाली क्षेत्रका लागि आरक्षित गरिएको सूचना अधिकारी सुनिलरञ्जन सिंहले जानकारी गराउनुभयो ।

अध्यक्षको उम्मेद्वारी दर्ता शुल्क रु २५ हजार र केन्द्रीय सदस्यको दर्ता शुल्क रु पाँच हजार निर्धारण गरिएको छ । केन्द्रीय सदस्य उम्मेवारी दिन खोज्ने कतिपय व्यक्तिले उम्मेदवारीको शुल्क बढी भएको प्रतिक्रिया दिएका छन् ।