भूकम्पकाे स्मरण गर्दै रेडिङमा मनाइयाे नयाँ वर्ष

लन्डन । ग्रेटर रेडिङ नेपाली समाजले भूकम्पको सम्झना गर्दै नयां वर्ष मनाएको छ । समाजका अध्यक्ष मानबहादुर गुरूङको अध्यक्षतामा भएको सो कार्यक्रममा गतवर्षको महाभूकम्पमा परी ज्यान गुमाउनेहरूको सम्झनामा मौनधारण र दीप प्रज्वलन गरिएको थियो । यस्तै समाजले नेपाल सरकारको राहत कोषमा दुई हजार दुईसय पचास पाउण्ड सहयोग प्रदान पनि गरेको छ । सो राशीको चेक लण्डनस्थित नेपाली दूतावासका थर्ड सेक्रेटरी बाबुकाजी डंगोललाई अध्यक्ष गुरूङले हस्तान्तरण गरे । समाजले धादिङको खहरेमा अवस्थित अचने उच्च माविलाई करिब २२ लाख रूपियां सहयोग गरी भवन निर्माण कार्य भइरहेको छ भने एनआरएनए यूकेलाई छ हजार सात सय पचास पाउण्ड हस्तान्तरण गरिसकेको जानकारी दिइयो ।

रेडिङ बोरो काउन्सिलकी मेयर सार ह्याकरको प्रमुख आतिथ्य र नेपाली दूतावासका थर्ड सेक्रेटरी बाबुकाजी डंगोलको विशेष आतिथ्यमा सम्पन्न उक्त कार्यक्रममा बोल्दै रेडिङ बरो काउन्सिलकी मेयर सार ह्याकरले नेपालमा गएको भूकम्पबाट ठूलो धनजनको क्षतिप्रति दुःख ब्यक्त गरिन् । साथै उनले नेपाली नयां वर्ष २०७३ को शुभकामना दिइन् । विशेष अतिथिको आसनबाट बोल्दै नेपाली दूतावासका थर्ड सेक्रेटरी बाबुकाजी डंगोलले नेपालीहरुको दुःखमा ग्रेटर रेडिङ नेपाली समाजले अग्रणी भूमिका खेलेकोमा धन्यवाद दिए । साथै नेपाली दूतावासका एट्याची तेजेन्द्र रेग्मीले महाभूकम्पको विषयमा जानकारी गराएका थिए ।

समाजका सल्लाहकार समितिका तर्फबाट ढकबहादुर गुरुङले गत वर्षको विनाशकारी भूकम्पको सम्झना गर्दै नयां वर्ष २०७३ को शुभकामना दिए । सोही क्रममा समाजका सल्लाहकार राम गलामीले उपस्थित सम्पूर्ण अतिथिहरुलाई धन्यवाद दिएका थिए । रेडिङमा रहेका सम्पूर्ण संघसस्थाको तर्फबाट रेडिङ तामाङ घेदुङ अध्यक्ष प्रेम लामाले नयां वर्षको शुभकामना दिए ।

नयां वर्ष कार्यक्रमका संयोजक तथा ग्रेटर रेडिङ नेपाली समाजका उपाध्यक्ष कृष्ण न्यौपानेले अतिथिहरुलाई स्वागत गरे । साथै उनले एक सय पाउण्ड सहयोग गरेकामा समाजका सदस्य राजेन्द्र श्रेष्ठ लगायत कार्यक्रमको व्यवस्थापन गर्ने 
सम्पूर्ण टिमलाई धन्यवाद दिए ।

स्वागतकै सिलसिलामा कवयित्री निर्मला न्यौपानेले स्वागत गीतमार्फत अतिथिहरुको स्वागत गरिन् । कार्यक्रममा नेपाली कलाकारहरु हेमन्त शर्मा, रामजी खांड, देवीका केसीको सुमधुर गीत संगीतमा झुम्दै रेडिङवासीहरुले नयां वर्षलाई स्वागत गरेका थिए । कार्यक्रमलाई अत्यन्त भब्य र आकर्षक ढंगबाट ग्रेटर रेडिङ नेपाली समाजका कार्यवाहक महासचिव डा. ओमकार अधिकारीले सञ्चालन गरेका थिए ।