एमाले पोलिटब्युरो बैठकमा ओलीको प्रतिवेदनमाथि टिप्पणी

काठमाडौँ, २५ चैत । नेकपा (एमाले) को पोलिटब्युरोको बैठक आज पनि जारी रह्यो ।

बैठकमा अध्यक्ष तथा प्रधानमन्त्री केपी शर्मा ओलीको राजनीतिक प्रतिवेदनमाथि आज ११ जना सदस्यले आफ्ना धारणा र सुझाव राख्नुभएको छ । अध्यक्ष ओलीले मङ्लबारको बैठकमा १२ पृष्ठको प्रतिवेदन पेस गर्नुभएको थियो ।

आजको बैठकमा भानुभक्त ढकाल, लालबाबु पण्डित, विन्दा पाण्डे, यमलाल कँडेल, परशुराम मेघी गुरुङ, अरुण नेपाल, कर्ण थापा र गणेश तिमल्सिनाले प्रतिवेदनमाथि बोल्नुभयो ।

सदस्यहरुले संविधान निर्माण र राष्ट्रियताको अडानको भूमिका सकारात्मक रहेको बताउँदै पार्टीलाई एकताबद्ध र गतिशील बनाएर अघि बढाउन सुझाव दिएका थिए । चाँडो विधान महाधिवेशन गरेर प्रदेशस्तरमा कमिटी विस्तारमा लाग्न उनीहरुको सुझाव थियो ।

पोलिटब्युरोको बैठक शुक्रबार ४ बजे पुनः बस्ने एमालेका सचिव प्रदीप ज्ञवालीले जानकारी दिनुभयो ।

एमालेको यही चैत २७ देखि ३० मा काठमाडौँमा हुने केन्द्रीय कमिटीको बैठकपूर्व पोलिटब्युरो बैठक बसेको हो । बैठकमा केन्द्रीय विभाग र सल्लाहकार समितिमा मनोनयन, पार्टीको भवन निर्माण, विधान संशोधन, केन्द्रीय निकायका प्रतिवेदनलगायत कार्यसूची छन् ।