नेपालमा अझै दैनिक ४० वटा भूकम्प

काठमाडौँ । गत वैशाख १२ गते ७.६ रिक्टर स्केलको विनाशकारी महाभुकम्प गएयता नेपालमा हरेकदिन सरदर ४० वटा भुकम्प जाने गरेका छन् ।

गोरखाकाे वारपाक केन्द्रविन्दू बनाएर गएकाे साे भुकम्प गएकाे एक वर्ष पुग्न केही दिन मात्र बाँकी रहेपनि अरू भुकम्प जानेक्रम अहिलेसम्म राेकिएकाे छैन ।

राष्ट्रिय भुकम्प मापन केन्द्रले उपलब्ध गराएकाे तथ्यांकअनुसार गत वैशाख १२ गतेबाट अहिलेसम्ममा ४ रिक्टर स्केलभन्दा माथिका ४४५ वटा भुकम्प गएका छन् । अहिले पनि दैनिक ४ रिक्टर मुनिका सरदर ४० वटासम्म भूकम्प गइरहेको केन्द्रले जनाएको छ ।

त्यसो त, वैशाख १२ को भूकम्पअघि पनि नेपालमा दिनहुँ ४ रिक्टर मुनिका १२ देखि १५ वटा भूकम्प गइरहेका हुन्थे । यद्यपि तिनको अभिलेख राखिन्नथ्यो ।

ठूलो भूकम्पपछि परकम्प आउनेक्रम जारी रहेको र अहिले पनि दैनिक ३० देखि ४० वटासम्म भूकम्प गइरहेको केन्द्रका प्रमुख लोकविजय अधिकारीले बताए ।

“वैशाख १२ को ७.६ रिक्टरको भूकम्पपछि हालसम्म गइरहेका परकम्प भनिए पनि भूकम्प नै हो”, – उनले भने ।

गोरखा भूकम्पपछि सुरुको एक महिनासम्म एक दिनमै ४ रिक्टर स्केलभन्दा मुनिका १ हजार ३०० वटासम्म भूकम्प (परकम्प) गएका थिए भने लामो समयसम्म दैनिक ५०० वटा भूकम्प गएका थिए ।

पछिल्लो समय परकम्प कम हुँदै गएको छ । ठूलो भूकम्प गएपछिको अवस्थामा लामो समयसम्म परकम्प नगएमा ठूलो भूकम्प जाने खतरा भएकाले परकम्प समय समयमा गएकै राम्रो हुने विज्ञहरु बताउँछन् ।

केन्द्रको विवरणअनुसार वैशाख १२ को भूकम्पअघिका वर्षहरुमा ४ रिक्टर स्केलभन्दा माथिका वार्षिक २५ देखि ६० वटा भूकम्प गएका थिए ।

यसैबीच आज बिहान ९ बजेर ४० मिनेट जाँदा बाजुरा केन्द्रविन्दु भएर ४.३ रिक्टर स्केलको अर्को भूकम्प गएको केन्द्रले जनाएको छ ।