बुधबार, कार्तिक ५ २०७७ | Wed, October 21, 2020
नेपालको समय: १२:५७ | UK Time: 08:12

प्याराग्लाइडिङमा पर्यटकको आकर्षण बढ्दै

वीनेपाली
२०७२ चैत २१ गते १५:१८

Paragliding_Nepal1

पोखरा, २१ चैत । पर्यटकीय नगरीका रुपमा ख्याती कमाएको पोखरामा प्याराग्लाइडिङतर्फ पर्यटकको आकर्षण बढेको छ ।

साहसिक पर्यटनका रुपमा लिइने प्याराग्लाइडिङकै लागि विभिन्न देशबाट बाह्य पर्यटक पोखरा आउने गरेका छन् । पछिल्लो समयमा यो आन्तरिक पर्यटकको रोजाइमा पनि पर्दै गएको छ ।

पर्यटकको बढ्दो आकर्षणलाई दृष्टिगत गरी पोखरामा मात्रै ४५ वटा कम्पनीले प्याराग्लाडिङ सञ्चालन गर्दै आएको नेपाल हवाई खेलकुद संस्थाका कार्यबाहक अध्यक्ष सोभियत बानियाँले जानकारी दिनुभयो । नेपालमा हाल ६५ वटा कम्पनीले प्याराग्लाइडिङ सञ्चालन गर्दै आएका छन् । पोखरासहित बन्दीपुर, काठमाडौँ, सुर्खेंत, पाल्पा र धरानमा प्याराग्लाइडिङ सञ्चालन गरिँर्दै आइएको छ ।

नेपालमा सन् १९९७ मा सनराइज प्याराग्लाइडिङले पहिलोपटक पोखराको सराङकोटबाट प्याराग्लाइडिङ उडान सुरु गरेको थियो । प्याराग्लाइडिङका लागि संस्कृति, पर्यटन तथा नागरिक उड्डयन मन्त्रालयबाट अनुमति पाएका कम्पनीले अनिवार्य रूपमा नेपाल नागरिक उड्डन प्राधिकरणबाट उडान सञ्चालन अनुमति (एओसी) लिनुपर्ने प्रावधान रहेको छ ।

विशेष गरी पोखरा आउने पर्यटकले साहसिक पर्यटनका रुपमा प्याराग्लाइडिङलाई लिने गरेको र त्यसका माध्यमबाट प्राकृतिक दृश्यावलोकनको भरपुर आनन्द लिन गरेका पोखरा पर्यटन परिषद्का अध्यक्ष सोम थापा बताउनुहुन्छ ।

“प्याराग्लाइडिङ यहाँको विशेष आकर्षण हो,” उहाँले भन्नुभयो, “प्याराग्लाइडिङकै लागि बाह्य पर्यटक पोखरा आउने गरेका छन्, पछिल्ला समयमा आन्तरिक पर्यटकको सङ्ख्या पनि बढ्दै गएको छ ।”

पोखरामा दैनिक करिब १५० वटा प्याराग्लाडिङ उडान सञ्चालन हुने गरेका नेपाल हवाई खेलकुद संस्थाले जनाएको छ । भूकम्प र नाकाबन्दीको अवस्थामा समेत बाह्य तथा आन्तरिक पर्यटक प्याराग्लाइडिङका लागि पोखरा आएका थिए ।

प्रतिक्रिया

सम्बन्धित सामाग्री

फेसबुक