फाइल तस्विर
संयुक्त राष्ट्रसंघ, ८ फागुन । संयुक्त राष्ट्रसंघीय सुरक्षा परिषदको बैठकमा सिरियाका बारेमा रसियाले राखेको प्रस्तावलाई विश्व समुदायले नै अस्वीकार गरेको समाचार छ ।
संयुक्त राष्ट्रसंघीय सुरक्षा परिषदको बैठकमा रसियाले सिरियामा टर्कीले आक्रमण गर्न नपाउने भनी प्रस्ताव गरेको थियो ।
सिरियाको छिमेकी देश टर्की र रसियाबीच बिगत लामो समयदेखि विवाद चल्दै आएको छ । सो विवादको क्रम हाल पनि जारी नै छ ।
सिरियामा बिगत पाँच वर्षदेखि गृहयुद्ध जारी रहेको छ । सिरियामा तुरुन्तै कुनै कदम नचालेमा त्यसको परिणाम झन्भन्दा झन नराम्रो हुदै जाने प्रतिक्रिया अमेरिकी विदेशमन्त्रीले हालै दिनुभएको थियो ।
विदेशमन्त्री केरीको सो प्रतिक्रियापछि शुक्रबार संयुक्त राष्ट्रसंघीय सुरक्षा परिषदको बैठक बसिरहेको छ । सो बैठकमा रसियाले राखेको प्रस्ताव अन्य सदस्यहरुले अस्वीकार गरेका हुन् ।
सो बैठकको लगत्तै अमेरिकी राष्ट्रपति बाराक ओबामाले टर्किस् राष्ट्रपति रिसेप ताइप एर्दाेगेनलाई फोनगरी संयमतापूर्वक कामगर्न आग्रह गर्नुभएको बताइएको थियो ।
शुक्रबार भएको सो परिषदको आकस्मिक बैठकमा रसियाले सिरियाली सरकारी पक्षलाई अनावश्यक रुपमा संरक्षणको काम गरेको भन्दै त्यसको विरोध भएको थियो ।
उक्त बैठकपछि प्राप्त अर्काे एक समाचारअनुसार सिरियाली सरकारलाई सुरक्षा र संरक्षण गर्नेगरी सिरियामा आक्रमण नगर्न पनि रसियालाई आग्रह गरिएको बताइएको छ ।
अमेरिकाले रसियाले सिरियामा गरेको भनेको कारबाहीबाट सिरियाली सरकारी अधिकारी एवम् राष्ट्रपति बसर अल असदको संरक्षण र सुरक्षा प्रदान गरेको भन्दै अमेरिकाले सो आक्रमण तत्कालै रोक्न आग्रह गरेको हो ।
सिरियाको उत्तरी प्रान्त अलेपोमा सिरियाली सैनिकले हालैका दिनमा गर्ने गरेका आक्रमणहरुमा पनि रसियाली सैनिकको हात रहेको अधिकारवादीहरुले जनाएका छन् ।
उनीहरुले सो अक्रमणमा लगभग ५ सय व्यक्तिको मृत्यु भएको र अरु हजारौँले देश छोडेर भाग्न खोजिरहेको जनाइएको छ । त्यस क्षेत्रमा अधिकारवादीहरुका साथै अरु पनि कोही पुग्न नसकेको जनाइएको छ ।
यस नगरमा यही फेब्रुअरीको सुरुदेखि नै सिरियाली विद्रोही र आतङ्ककारीलाई लक्ष्यगरी गरेको यस आक्रमणहरूमा कैयौं सर्वसाधारणले पनि ज्यान गुमाएको सिरियन अब्जरभेटरी फर ह्युम्यान राइट्सले जानकारी दिएको छ ।
दक्षिणी टर्कीसँग सीमा जोडिएको यस क्षेत्रमा रहेको अलपो प्रान्तमा आतङ्ककारीविरुद्ध गरेको कारबाहीमा सफलता प्राप्त भएको सिरियाली सैनिकले दाबी गर्ने गरेपनि ती क्षेत्रमा भएका कारबाहीहरुमा सर्वसाधारण नै बढी पर्ने गरेका छन् ।
सिरियामा शान्ति स्थापनाका कार्यहरु पछिल्लो समयमा आएर गति लिने गरेको भएपनि त्यसमा सफलता प्राप्त हुन भने सकिरहेको छैन ।
त्यसैगरी पछिल्लो पटक गत हप्तामात्र पनि जर्मनीमा सिरियाली समूहका विदेशमन्त्रीहरुको बैठक बसेको थियो । सो बैठकबाट पनि सिरियामा शान्ति स्थापनाको काम सफल हुन सकेको छैन ।
सिरियाली सहयोग समूहका विदेशमन्त्रीहरुको उक्त बैठकमा सिरियामा आगामी केही दिनमा नै युद्धविरामका लागि आग्रह गरिने बताइएको थियो । तर यस विषयमा सिरियाली विद्रोही तथा सरकारका बीचमा कुनै छलफल भने भएको छैन ।
