लन्डन उत्रिए उपप्रधानमन्त्री थापा, सांझ विशेष समारोह

लन्डन । उपप्रधान एवं परराष्ट्रमन्त्री कमल थापा बेलायत नेपाल कुटनीतिक सम्वन्ध स्थापनाको २०० औं वर्षका अवसरमा यहां हुने विशेष समारोहमा भाग लिन लन्डन आइपुगेका छन् ।

थापा बुधवार बिहान कतार एयरवेजबाट हिथ्रो विमानस्थलको टर्मिनल फोरमा उत्रंदा उनलाई कार्यवहाक राजदूत तेजबहादुर क्षेत्री लगायत कार्यकर्ताले स्वागत गरेका थिए । थापाका साथ परराष्ट्र सहसचिव प्रकाशकुमार सुवेदी, उपसचिव कुमार खरेल र स्वकिय सचिव भरतकुमार रेग्मी पनि छन् ।

थापाको व्यस्त भ्रमण तालिका छ । उनको आजै दिउसो एफसीओ र संसदमा बैठक छन् भने सांझ बेलायती विदेश मन्त्रालय (एफसीओ) ले 
दौत्य सम्वन्ध स्थापनाको उपलक्ष्यमा आयोजना गर्ने विशेष 
समारोहमा सम्वोधन गर्ने कार्यक्रम छ । उक्त समारोहमा बेलायती विदेश राज्यमन्त्री ह्युगो स्वायर र अन्तर्राष्ट्रिय विकास मन्त्री डेसमण्ड स्वायनले पनि सम्वोधन गर्नेछन् । कार्यक्रममा बेलायती साथै नेपाली संघसंस्थाका सिमित नेपाली प्रतिनिधि, वुद्धिजिवी र सञ्चारकर्मीहरुलाई निम्त्याइएको छ ।

मन्त्री थापा बिहीबार विहानदेखि एफसीओमा हुने परामर्श संयन्त्रको दोश्रो बैठकमा सहभागी हुने दूतावास श्रोतले जनाएको छ । परामर्श संयन्त्रको बैठकमा थापासहित नेपाली प्रतिनिधिमण्डल, कार्यवहाक राजदूत क्षेत्री र एफसीओका दक्षिण एसिया निर्देशक एवं नेपाल हेर्ने प्रतिनिधिबीच छलफलको कार्यक्रम छ ।

मन्त्री थापाले १९ डिसेम्बर, शनिवारसांझ लन्डनस्थित नेपाली दूतावासमा गैर आवासीय नेपाली संघ, बेलायतसहित अन्य विभिन्न नेपाली संघसंस्थाका प्रतिनिधिहरुको उपस्थितिमा हुने एक कार्यक्रमलाई सम्वोधन गर्ने जनाइएको 
छ । थापाले भूपू गोर्खाहरुसंग पनि भेट्ने कार्यक्रम छ ।

यसैबीच, यहांका केही आदिवासी जनजाति संघसंस्थाले संघीयता विरोधी भन्दै मन्त्री थापाको विरोध गर्ने कार्यक्रम राखेका छन् ।