काठमाडौँ, १९ मङ्सिर । प्रधानमन्त्री केपी शर्मा ओलीसमक्ष नेपाल निर्माण सामग्री व्यापार सङ्घले अघोषित नाकाबन्दीका कारण उत्पन्न समस्या समाधान गर्न माग गर्दै आज ज्ञापनपत्र प्रस्तुत गरेको छ ।
सङ्घका अध्यक्ष श्रीकृष्ण रिजालको नेतृत्वमा पदयात्रासहित प्रधानमन्त्री कार्यालय बालुवाटार पुगेको टोलीले महिनौँदेखिको तराई बन्द, हड्ताल र नाकाबन्दीका कारण व्यापार व्यवसाय चौपट भएको भन्दै त्यसलाई जतिसक्दो चाँडो समाधान गर्न आग्रह गरेको छ ।
सो अवसरमा प्रधानमन्त्री ओलीले नाकाबन्दीका कारण व्यापार÷व्यवसाय मात्र नभई मुलुकले ठूलो आर्थिक क्षति व्यहोर्नुपरेको बताउँदै जतिसक्दो चाँडो बन्द, हड्ताल र नाकाबन्दी खुलाउने बारे छलफल भइरहेको बताएको अध्यक्ष रिजालले जानकारी दिए ।
व्यवसायीले बन्द, हड्ताल र नाकाबन्दीका कारण उद्योग व्यवसाय बन्द गर्नुपरेको अवस्थामा व्यवसायीले बैंकबाट लिएको ऋणको व्याज र आयकरमा छुट गर्नुपर्नेसमेत माग गरेका छन् । सो सङ्घले भारतीय दूतावासमा समेत आज ज्ञापनपत्र बुझाएको छ ।
