तराई आन्दोलनबाट रु २०० अर्ब घाटा

काठमाडौँ, ७ मङ्सिर । विगत १०० दिनदेखि जारी मधेश आन्दोलनका कारण नेपालको अर्थतन्त्र नराम्ररी प्रभावित भएको छ । उद्योगी, व्यवसायीहरुले मधेश समस्या तत्काल समाधान गरि निकास दिन जोड दिएका छन् ।

नेपाल उद्योग वाणिज्य महासङ्घ, उद्योग समितिका सभापति उमेशलाल श्रेष्ठ, राष्ट्रिय व्यापार सङ्घका अध्यक्ष नयनबहादुर क्षेत्री र रेमिट्यान्स एसोसियसनका अध्यक्ष देवीप्रसाद भट्टचनले १०० दिनदेखि जारी तराई आन्दोलनले रु २०० अर्ब घाटा लागेको बताउँदै उद्योग सञ्चालन गर्ने वातावरण मिलाउन सरकारसँग आग्रह गरे ।
उद्योगमन्त्री सोमप्रसाद पाण्डेयले देशलाई आत्मनिर्भरताको बाटामा अगाडि लैजानुपर्ने बताएका छन् । मिडिया इन्टरनेसनलले आज यहाँ आयोजना गरेको ‘नाकाबन्दीमा नेपाली उद्योगको अवस्था’ विषयको अन्तक्र्रियामा मन्त्री पाण्डेले कृषि, जलस्रोतलगायत क्षेत्रमा नयाँ सोच र योजनाका साथ अगाडि बढ्नुपर्ने बताए । उनले नेपालको पारवहन सुविधालाई सहज बनाउन छिमेकी मुलुकलाई आग्रह गरे ।

नेपाल औषधि उत्पादक सङ्घका वरिष्ठ उपाध्यक्ष दीपकप्रसाद दाहालले सरकारको खुला बजारका कारणले औषधि क्षेत्रमा समस्या उत्पन्न भएको बताए ।

राष्ट्रिय कफी व्यवसाय महासङ्घका अध्यक्ष उत्पादित कफीको कच्चापदार्थको अभावका कारण प्रशोधन गर्न समस्या परेको गुनासो गरेका थिए । फुटवेयर एसोसियसनका उपाध्यक्ष कृष्णप्रसाद फुयाँलले कच्चापदार्थको अभावले अधिकांश कम्पनी बन्द भएको बताए भने नेपाल बोटल वाटर सङ्घका अध्यक्ष सुवास भण्डारीले इन्धन अभावले ५० प्रतिशत पानी उद्योग बन्द भएको जानकारी दिए ।