उपत्यका बाहिरिने यात्रु घटे

काठमाडौँ, १ कात्तिक । दसैँ र इन्धन अभावको मौका छोपेर घर हिँडेका यात्रुसँग बढी भाडा लिने सवारी साधनको अनुगमन गर्न निस्कने यातायात व्यवस्था विभागको सवारीलाई नै इन्धनको अभाव भएको छ ।

कार्यालयका सवारी साधनमा इन्धन नभएकाले नियमित अनुगमन गर्न समस्या हुन थालेको विभागका प्रवक्ता वसन्त अधिकारीले बताउनुभयो । “ठाउँठाउँमा तेलका लागि प्रयास गरयौँ तर पाउन सकेका छैनौँ, यसअघि सात दिन लगाएर ल्याएको १५ लिटर तेल सकिएकाले अनुगमनमा समस्या भएको छ”– उनले भने ।

बल्खुबाट हेटौँडा चल्ने टाटा सुमोले तोकिएकोभन्दा तेब्बर भाडा लिएको गुनासो आएको पनि विभागले जनाएको छ । विभागले बीचमा अनुगमन गर्दा रिजर्भ भनी हिँड्ने गरेकाले गन्तव्यमा पुगेपछि अनुगमन गर्न मकवानपुरका प्रमुख जिल्ला अधिकारीलाई पत्राचार गरिएको जनाएको छ ।

यात्रु पनि गन्तव्यमा जानुपर्ने बाध्यताले रिजर्भ नै भन्ने गरेकाले दसैँपछि उजुरी गरेमा कारबाही गरिने व्यवस्था गरिएको अधिकारीले जानकारी दिए ।

विभागले तोकेभन्दा बढी भाडा लिने सवारीका विषयमा ट्राफिक प्रहरीको १०३ नं मा फोन गरी उजुरी गरेमा ब्लु बुक खोसी सवारी चालकलाई कारबाही गर्ने व्यवस्था गरिएको छ । यात्रुसँग बढी भाडा लिने सवारीको जानकारी गराउन उपत्यकाका १२ स्थानमा खोलिएका नागरिक सहायता कक्षमा पनि उजुरी गर्न विभागले अनुरोध गरेको छ ।

इन्धनको अभावले गर्दा यस वर्ष दसैँमा उपत्यका बाहिरिने यात्रु घटेको महानगरीय ट्राफिक प्रहरी महाशाखाले जनाएको छ । असोज महिनाभरमा उपत्यका बाहिर गएका एक लाख ३२ हजार ९५१ सवारी साधनमा १० लाख ५५ हजार २३२ मानिस बाहिरिएका छन् । उपत्यका भित्रिएका एक लाख ३१ हजार २६६ सवारीमा १३ लाख १७ हजार ३४२ यात्रु प्रवेश गरेको महाशाखाका प्रवक्ता राजेन्द्रप्रसाद भट्टले जानकारी दिए ।

“यस वर्ष तराईमा आन्दोलन र भारतसँगको सीमा नाका बन्द रहेकाले उपत्यका भित्रिने यात्रुको सङ्ख्या बढेको हुनसक्छ”– प्रवक्ता भट्टले भने ।