व्यवस्थापिका संसदमा शुक्रबार भएको सभामुख पदको निर्वाचनमा एकीकृत नेकपा (माओवादीका) का सभासद् ओनसरी घर्ती निर्वाचित भएपछि अभिवादन गर्नुहुँदै, साथमा प्रधानमन्त्री केपी शर्मा ओली लगायत अन्य सभासद्हरु । तस्बिर ः रत्न श्रेष्ठ, रासस ।
काठमाडौँ, २९ असोज । नेपालको संविधान लागू भएपछि व्यवस्थापिका–संसद्को सभामुख पदमा एकीकृत नेकपा (माओवादी)का सांसद् ओनसरी घर्ती निर्विरोध निर्वाचित भएकी छिन् ।
विसं. २०४६ को प्रजातान्त्रिक परिवर्तनपछि आठौँ सभामुख भएकी घर्ती पहिलो महिला सभामुख पनि भएकी छिन् ।
व्यवस्थापिका–संसद्को आजको बैठकमा सो पदमा अर्का उम्मेदवार नेपाल मजदुर किसान पार्टीका सांसद अनुराधा थापामगरको उम्मेदवारी फिर्ता भएपछि घर्ती निर्विरोध निर्वाचित हुनुभएको हो । बैठकको अध्यक्षता गरिरहेका ज्येष्ठ सदस्य लक्ष्मण राजवंशीले घर्तीको सो पदमा एक मात्र प्रस्ताव कायम रहेकाले निर्विरोध निर्वाचित भएको घोषणा गरेका थिए ।
घर्ती निवर्तमान उपसभामुख हुन् । घर्तीको प्रस्तावकमा नेकपा (एमाले) का सांसद विद्यादेवी भण्डारी र समर्थकमा राष्ट्रिय प्रजातन्त्र पार्टी (नेपाल) का सांसद् कुन्तीकुमारी शाही र बहुजन शक्ति पार्टीका सांसद् विश्वेन्द्र पासवान थिए । घर्तीलाई प्रमुख प्रतिपक्षी दल नेपाली काँग्रेसले पनि समर्थन गरेको थियो ।
ज्येष्ठ सदस्य राजवंशीले घर्ती सो पदमा निर्वाचित भएकोमा बधाई दिँदै सफल कार्यकालको कामना गरे ।
