मुख्यसचिव डा सोमलाल सुवेदी
काठमाडौँ, ५ असोज । मुख्यसचिव डा सोमलाल सुवेदीले सरकारका सबै मन्त्रालय, आयोग, सचिवालय, कार्यालय र केन्द्रलाई सङ्घीयता कार्यान्वयन गर्ने सन्दर्भमा पाँचबुँदे निर्देशन दिएका छन् ।
मुख्य सचिव डा सुवेदीले मंगलबार सबै मन्त्रालय, आयोग र सचिवालयलाई संविधानले तोकेको तीन तहको कार्यसूची र सहवर्ती अधिकारबमोजिम आआफ्नो जनशक्ति, स्रोत र सङ्गठनको विवरण र मिलान गर्न सम्भावित तरिका र योजना तर्जुमा गर्ने, हरेक मन्त्रालय र निकायमा विगतको पुनःसंरचना प्राविधिक समितिलाई थप क्रियाशील बनाउने, उक्त समितिमा कानुन र लेखा शाखा प्रमुखलाई पनि समावेश गर्ने, त्यस्तो समितिले नियमित कार्य गरी १५–१५ दिनमा कार्य प्रगति सामान्य प्रशासन मन्त्रालयमा पठाउन निर्देशन दिएका हुन् ।
त्यसैगरी आआफ्ना निकाय र मातहत निकायका कानुन संविधानअनुरुप मिलान, परिमार्जन र तर्जुमा गर्नुपर्ने प्राथमिकता सूची तयार गरी कार्यान्वयन कार्य योजना बनाउन सचिवले नै संयोजन गरी कार्यान्वयन गर्ने व्यवस्था मिलाउन, प्रदेशमा रहेका आआफ्ना जनशक्ति, स्रोत, सम्पत्ति विवरण तयार गर्न र अब उप्रान्त सङ्गठन संरचना परिवर्तन र सङ्गठन विकास अध्ययन गर्दा सङ्घीय ढाँचा एवम् संविधानबमोजिम आवश्यक पर्नेबाहेक कर्मचारी दरबन्दी थप्ने कार्य नगर्न पनि निर्देशन दिएका छन् ।
