भारतीय विदेश सचिव नेपालमा

भारतीय विदेश मन्त्रालयका सचिव एस जयशङ्कर काठमाडौँस्थित त्रिभुवन विमानस्थलमा । उहाँलाई नेपालका लागि भारतीय राजदूत रञ्जित रेले स्वागत गर्नुभएको थियो । तस्बिर ः रत्न श्रेष्ठ, रासस

काठमाडौँ, १ असोज । भारतीय प्रधानमन्त्री नरेन्द्र मोदीको विशेष दूतका रुपमा भारतीय विदेश मन्त्रालयका सचिव एस जयशङ्कर शुक्रबार काठमाडौँ आइपुगेका छन् ।

राष्ट्रपति डा रामवरण यादवसँग उनले शीतल निवासमा आजै भेटघाट गर्ने कार्यक्रम छ ।

नेपाली काँग्रेसका सभापति एवम् प्रधानमन्त्री सुशील कोइराला, नेकपा (एमाले) का अध्यक्ष केपी शर्मा ओली, एकीकृत नेकपा (माओवादी)का अध्यक्ष पुष्पकमल दाहाल एवम् तराई मधेस केन्द्रित राजनीतिक दलका नेताहरुसँग समेत विदेश सचिव जयशङ्करले अलग अलग भेटघाट गर्ने तय भएको छ ।

संविधानसभाले नेपालको संविधान, २०७२ पारित गरी असोज ३ गते जारी गर्न लागेको सन्दर्भमा उनको भ्रमण भएको हो ।

नेपालस्थित भारतीय दूतावासका प्रेस सूचना तथा संस्कृति विभाग प्रमुख अभयकुमारले दिनुभएको जानकारीअनुसार विदेशसचिव जयशङ्करले नेपालमा रहँदा नेपालका प्रमुख राजनीतिक दलका शीर्ष नेतासँग राजनीतिक अवस्थाका बारेमा कुराकानी गर्ने जनाइएको छ ।