आइतबार, माघ ४ २०७७ | Sun, January 17, 2021
नेपालको समय: २१:०२ | UK Time: 15:17

मुलुकभर दीपावली गर्न एमाओवादीको आग्रह

वीनेपाली
२०७२ असोज १ गते २:०६

काठमाडौँ, ३१ भदौ । एकीकृत नेकपा (माओवादी)ले नयाँ संविधान जारी हुने दिन असोज ३ मा मुलुकभर दीपावली गर्न र ४ गते संयुक्तसभाको कार्यक्रम सफल पार्न पार्टी पङ्क्तिलाई निर्देशन दिएको छ ।

एमाओवादीका महासचिव कृष्णबहादुर महराले आज एक विज्ञप्ति प्रकाशित गरी ऐतिहासिक उत्सवका रुपमा मनाउन र थप अधिकार प्राप्तिको दिशामा केन्द्रीत हुन पार्टी पङ्क्ति, र जनसमुदायमा आग्रह गर्नुभएको छ ।

आगामी असोज ३ गते संविधानसभा भवन नयाँ बानेश्वरमा नेपालको संविधान, २०७२ जारी गर्ने कार्यक्रम तय भएको छ ।

सम्पूर्ण वर्ग, जाति, क्षेत्र लिङ्गका जनताका आर्थिक, सामाजिक, राजनीतिक, सांस्कृतिक अधिकारलाई नयाँ संविधानमा मुखरित गरी एक समृद्ध र परिस्कृत संविधान नेपाली जनतालाई दिने कार्यभार केही बाँकी रहेपनि हाल प्राप्त भएको सङ्घीयता, गणतन्त्र, धर्मनिरपेक्षता, समावेशी, समानुपातिकजस्ता महत्वपूर्ण उपलब्धि भएकाले त्यसलाई आत्मसात गर्न महासचिव महराले आग्रह गर्नुभएको छ ।

समाजवादी अर्थतन्त्रको विकासलाई समृद्ध गर्दै देशलाई अग्रगामी दिशामा लैजाने कुरामा राष्ट्रिय सहमति हुनु महत्वपूर्ण उपलब्धि भएको उल्लेख गर्दै उहाँले थारु, जनजाती, मधेसी, महिला, दलित, मुस्लिमलगायतका भावना र मागलाई सम्बोधन गर्ने सङ्कल्पको दस्तावेज नयाँ संविधान रहेको उल्लेख गर्दै नेपालको राष्ट्रिय स्वाभिमानको विजयका रुपमा आत्मसात गर्न अनुरोध गर्नुभएको छ ।

प्रतिक्रिया

सम्बन्धित सामाग्री

फेसबुक