काठमाडांै । संविधान सभाले नेपालको संविधान दुई तिहाई बहुमतले पारित गरेको छ ।
बुधबार संविधान सभा दुई तिहाई बहुमतले पारित गरेको हो । संविधान पारितको पक्षमा ५०७ र विपक्षमा २५ मत परेको थियो । सभाध्यक्ष सुवास नेम्बाङले दुई तिहाईले पारित भएको घोषणा गरेका हुन् । संविधान सभाका सभासदहरुले दुई तिहाइबहुमतले पारित संविधानलाई टेवुल ठोकेर स्वागत गरेका थिए । यो संविधान आगामी ३ असोज ५ बजे सार्वजनिक समारोहवीच जारी गरेपछि कार्यान्वयनमा आउने छ । यसअघि संविधानमा सभासदहरुले हस्ताक्षर गर्नेछन् ।
यसअघि, संविधानसभाका अध्यक्ष सुवास नेम्वाङले नेपालको संविधानको परिमार्जित विधेयकको सम्पूर्ण धारा, अनुसूची, प्रस्तावना, संक्षिप्त नाम र प्रारम्भ विधेयकको अंग बनेको घोषणा गरे । राससका अनुसार, संविधानसभाको बुधबारको बैठकमा अध्यक्ष नेम्वाङले नेपालको संविधानको परिमार्जित विधेककको प्रस्तावना, संक्षिप्त नाम र प्रारम्भलाई विधेयकको अङ्ग बनोस् भनेर राख्नुभएकामा बैठकले त्यसलाई पारित गरेको हो । सो विधेयक पारित भएको घोषणा गर्दै उनले संविधानको नाम ‘नेपालको संविधान २०७२’ रहने जानकारी दिए । यो संविधान २०७२ साल असोज महिनाको ३ गतेदेखि प्रारम्भ हुने उनले बताए ।
