तस्विरः इकान्तिपुर
काठमाडौँ, २९ भदौ । सर्वोच्च अदालतले देशका विभिन्न भागमा भइरहेको आन्दोलनका क्रममा सुरक्षाकर्मीले घातक हतियारको प्रयोग गरेको भए त्यसलाई रोक्न अन्तरिम आदेश दिएको छ ।
आन्दोलनका क्रममा सुरक्षाकर्मीबाट घातक अश्रुग्यास र कानुनविपरीत आन्दोलनकारीको घुँडाभन्दा माथि गोली प्रहार गरिएको जनाई यही भदौ १७ गते पर्सा वीरगन्जकी विस्मिलाह खातुनको वारेस भई रक्षाराम हरिजनले दिएको निवेदनमाथि आज न्यायाधीश वैजनाथ उपाध्याय र दीपकराज जोशीको संयुक्त इजलासले कानुनको अधीनमा रही बल प्रयोग गर्न आदेश दिएको हो ।
अदालतका प्रवक्ता नहकुल सुवेदीले शान्तिसुरक्षा कायम गर्नु सरकारको दायित्व भए पनि निवेदनबमोजिम आन्दोलनमा रासायनिक अश्रुग्यास र घातक हतियार प्रयोग गरिएकोे भए त्यस्तो हतियार प्रयोग नगर्न आज फैसला आएको बताउनुभयो ।
आदेशमा स्थानीय प्रशासन ऐनले तोकेको मापदण्डभित्र रही बल प्रयाग गर्न सुरक्षा निकायलाई निर्देशन दिइएको छ ।
