उहाँहरुबीच संविधान निर्माण प्रक्रिया र देशको पछिल्लो राजनीतिक अवस्थाबारे कुराकानी भएको थियो ।
राष्ट्रपतिका प्रेस सल्लाहकार राजेन्द्र दाहालका अनुसार राष्ट्रपति यादवले प्रधानमन्त्री कोइरालालाई टेलिफोन गरी असन्तुष्ट पक्षको माग सम्बोधन गर्न लम्ब्याइएको समयसीमालाई समस्या समाधानको अवसरका रुपमा उपयोग गर्न सुझाव दिनुभएको थियो । अहिले तराईलगायतका क्षेत्रमा आन्दोलन गरिरहेका समूहहरुलाई सहमत नगराई राम्रो संविधान नबन्ने भएकाले २–४ दिन समय थपेर भएपनि सहमति खोज्नुपर्नेमा राष्ट्रपतिले जोड दिनुभएको दाहालले जानकारी दिनुभयो ।

प्रधानमन्त्री कोइरालालाई वार्ताबाटै सहमति खोज्न सुझाव दिँदै उहाँले असन्तुष्ट पक्षलाई लोकतान्त्रिक ढंगबाट विरोधका कार्यक्रम सञ्चालन गर्न पनि आग्रह गर्नुभएको प्रेस सल्लाहकार दाहालले बताउनुभयो ।