हिंसाको राजनीतिले संविधान रोकिन्न–मन्त्री बस्नेत

भक्तपुर, २६ भदौ । उद्योग मन्त्री महेश बस्नेतले हिंसाको राजनीतिले अब कुनै हालतमा संविधान नरोकिने बताएका छन् ।

भक्तपुर बहिरा सङ्घको १९ औँ वार्षिक साधारणसभाको शनिवार यहाँ उद्घाटन गर्दै उनले संविधान जारी गर्न नदिन तराईमा हिंसाको राजनीति गरेपनि त्यो सफल नहुने बताए ।

हिंसात्मक गतिविधि गरेर मधेसलाई पहिचानसहितको छुट्टै राज्य बनाउनुपर्ने माग राखेर गरिएको आन्दोलन गलत भएको उनको भनाइ थियो ।

सरकारले वार्ताको आह्वान गरिसकेकाले तत्काल समस्या समाधान गर्न आन्दोलनरत मधेसवादी दलका नेतालाई उनले आग्रह गरे ।

कार्यक्रममा यसवर्षको प्रवेशिका परीक्षामा उतीर्ण हुने तीनजना बहिरा विद्यार्थीलाई सम्मान गर्दै सरकारले बहिराहरूका लागि साङ्केतिक एवम् दोभाषेको व्यवस्था गर्नुपर्ने माग बस्नेतको थियो ।