बुधबार, असोज ७ २०७७ | Wed, September 23, 2020
नेपालको समय: १०:०५ | UK Time: 05:20

एमाले मुख्यालयमा प्रतिस्पर्धाबाट कर्मचारी छनोट गरिने

वीनेपाली
२०७२ भदौ २२ गते १६:२३

0काठमाडौँ, २२ भदौ । नेकपा (एमाले) केन्द्रीय कार्यालयको सङ्गठनात्मक संरचनालाई व्यवस्थित र पारदर्शी बनाउन पहिलो पटक कर्मचारीको आन्तरिक प्रतिस्पर्धाबाट छनोट गरिने भएको छ ।

बैठकले पार्टी कार्यालयको सञ्चालनलाई थप पारदर्शी र सहज पहुँचसहितको बनाउन केन्द्रीय सचिवालयले गठन गरेको कार्यदलले केन्द्रीय कार्यालयमा कर्मचारीलाई प्रशासन, लेखा र प्राविधिक समूहका रुपमा व्यवस्थित गर्ने र उनीहरुको सेवा तथा सुविधालाई समयानुकूल पुनरावलोकन गर्दै जाने निर्णयसहित रिक्त कर्मचारीमा आन्तरिक विज्ञापन गर्ने तय गरेको हो ।

पार्टीका प्रचार विभाग प्रमुख योगेश भट्टराईका अनुसार हाललाई पार्टी केन्द्रीय कार्यालयको लेखा शाखामा काम गर्ने गरी एक लेखा अधिकृत थप गरिनेछ । उक्त पदका लागि व्यवस्थापनमा कम्तीमा स्नातक गरेको, पार्टी सदस्य भएको र उक्त कामको अनुभव भएको मापदण्ड निर्धारित गरी कार्यालयको सूचना पार्टीका विज्ञापन गरिएको छ । केन्द्रीय सचिवालय सचिव प्रदीप ज्ञवाली संयोजक तथा सचिव भट्टराई, कार्यालय सचिव कृष्णगोपाल श्रेष्ठ र आर्थिक विभाग प्रमुख विष्णु रिमाल रहेको कार्यदलको आजको बैठकले सो निर्णय गरेको हो ।

योग्य उम्मेदवारको छनोटका लागि पार्टीको केन्द्रीय लेखा परीक्षण आयोगका अध्यक्ष पुष्प कँडेलको अध्यक्षतामा कार्यालय सचिव श्रेष्ठ र लेखाविज्ञ उमेश ढकाल रहेको छनोट समिति गठन गरिएको छ । सो व्यवस्थाले पदाधिकारी वा नेताको भनसुन तथा तजबिजीमा कार्यालयमा कर्मचारी नियुक्त हुन छैनन् ।

कार्यालयमा श्रेष्ठमातहतका उपसचिवलगायत कर्मचारी पूर्णकालीन तलबीमा कार्यरत हुन्छन् । कार्यालय सचिव श्रेष्ठले पार्टी केन्द्रका सबै गतिविधि पारदर्शी र व्यवस्थित गर्न कार्यदलले आगामी दिनमा थप निर्णय गर्ने पनि जानकारी दिनुभयो । यस्तै कार्यदलले केन्द्रीय कार्यालयबाट तलब, सुविधा र नियमित खर्च प्राप्त गर्ने कर्मचारीको बिमा गर्ने र नागरिक लगानी कोष साथै सञ्चयकोषको प्रबन्ध मिलाउने निर्णय गरेको छ ।

साथै यातायातका साधन तथा इन्धनमा पर्याप्त मितव्ययिता अपनाउने निर्णयसमेत गरिएको छ । पार्टी केन्द्रीय कार्यालयको प्रयोजनका लागि सुरक्षाकर्मी, माली, प्राविधिक सुपरभाइजर (बिजुली, पानी र प्लम्बिङसहितको काम गर्ने गरी) उपयुक्त व्यक्ति करारमा नियुक्ति गरिने भएको छ । भूकम्पको कारण क्षतिग्रस्त भएको बल्खुस्थित पार्टी केन्द्रीय कार्यालय भवनलाई आवश्यक प्रक्रिया पुरयाएर भत्काउने र काम लाग्ने सामाग्रीको व्यवस्थापन पनि यही कार्यदलले गर्नेछ ।

प्रतिक्रिया

सम्बन्धित सामाग्री

फेसबुक