
राप्रपाका बहुमत सदस्यद्वारा चन्द अध्यक्ष भएको घोषणा
काठमाडौँ, २० भदौ । राष्ट्रिय प्रजातन्त्र पार्टी (राप्रपा) का बहुमत केन्द्रीय सदस्यले पार्टी अध्यक्ष पशुपतिशमशेर राणालाई हटाई लोकेन्द्रबहादुर चन्दलाई अध्यक्ष बनाएको घोषणा गरेका छन् ।
राप्रपाका १०३ केन्द्रीय सदस्यमध्ये ६१ जना बहुमत केन्द्रीय सदस्यको हस्ताक्षरसहित आज निर्वाचन आयोगमा चन्दलाई अध्यक्ष बनाइएको जानकारी सो पक्षले दिएको छ ।
यहाँ आयोजित पत्रकार सम्मेलनमा चन्दले अब पार्टीको अध्यक्ष आफू भएको घोषणा गर्दै राणा अध्यक्षबाट हटेको जिकिर गर्नुभयो ।
चन्दले भन्नुभयो – “एक वर्षदेखि पार्टी केन्द्रीय समितिको बैठक बोलाइएको थिएन, पजनी शैलीमा सदस्य बढुवा–घटुवा गर्ने कार्य भइरहेको थियो । पार्टीको बृहत्तर एकताका लागि हामीले यो कदम चालेका हौँ ।”
उहाँले यो फुट नभई एकता भएको जनाउँदै पार्टी थप सशक्त भएर अघि बढ्ने बताउनुभयो ।
उहाँले यस अघिको एकता महाधिवेशनपछि पार्टीले राष्ट्रिय उचाइ लिने विश्वास विपरीत वैचारिक दृष्टिकोण र प्रक्रिया उपेक्षा गरेर निवर्तमान अध्यक्ष राणाले पार्टीलाई धराशायी बनाएको आरोप लगाउनुभयो ।
उहाँले केन्द्रीय समिति, भ्रातृ सङ्गठन कुनै निकायको बैठक नगरी विधानको उल्लङ्घन गर्दै जिल्ला सभापति नियुक्ति र बर्खास्ती गर्ने कार्य नेतृत्वले गरी पार्टीलाई ध्वस्त बनाएकोे टिप्पणी गर्नुभयो ।
नयाँ बन्ने संविधानमा राष्ट्रिय एकतासहितको सङ्घीयता, विभिन्न भाषा र संस्कृतिको सशक्तीकरण, पूर्ण धार्मिक स्वतन्त्रतासहितको सनातन सर्वधर्म सापेक्ष राष्ट्रका रुपमा पहिचान दिनुपर्ने पार्टीको माग रहेको उहाँले जानकारी दिनुभयो ।
पार्टीका वरिष्ठ नेता डा प्रकाशचन्द्र लोहनीले बृहत्तर हित र एकता हुने गरी आजको निर्णय भएको बताउनुभयो ।
विसं. २०४६ पछि सो पार्टी विभिन्न चरणमा फुट र एकताबाट गुज्रिएको छ ।
प्रतिक्रिया

सम्बन्धित सामाग्री
- सहमतिको एनआरएनए विशेष महाधिवेशन महासचिव शर्मा र सचिव जोशीको भूमिकाले विवादमा
- विशेष महाधिवेशनको घोषणापत्रमा विवाद, संस्थापनपक्षद्वारा सहमतिको उल्लङ्घन
- बेलायतमा अफ्रिकाका नयाँ भेरियन्टका ७७ संक्रमित फेला परे
- कोरोना विरुद्धको खोप अभियान १४ माघमा प्रधानमन्त्री ओलीले शुभारम्भ गर्ने
- भारतमा कोभिड–१९ सङ्क्रमितको संख्या एक करोड ६ लाख ५४ हजार भन्दा बढी
- नयाँ भाइरस तीव्र गतिमा फैलिएपछि लण्डन, पूर्वी र दक्षिण पूर्वी इंग्ल्याण्ड टियर ४ मा
- बेलायत सरकारद्वारा गोरखा भूपू सैनिकका लागि नयाँ पेन्सनको प्रस्तावमाथि सुझाव माग
- कोरोना खोपको पहिलो डोज लिएका पुडासैनीलाई कोरोना संक्रमण
- ‘बेलायतमा वर्क पर्मिट खुल्यो भनेर हल्लाको पछि नलागी बुझेर मात्र आउनुहोस्’ : सोलिसिटर दिपक भट्टराई
- बेलायत र युरोपियन युनियनबीच सहमति