आन्दोलनरत पक्षसँग वार्ता गर्न राप्रपाको माग

काठमाडौँ, १७ साउन । राष्ट्रिय प्रजातन्त्र पार्टीले संविधान निर्माणको प्रक्रिया रोकेर भएपनि अधिकतम् सहमतिका लागि आन्दोलनरत पक्षसँग वार्ता गर्न माग गरेको छ ।

पार्टीले आज केन्द्रीय कार्यालय चावहिलमा आयोजना गरेको पत्रकार सम्मेलनमा वार्ताका लागि मध्यस्थकर्ता खोजेर पनि नयाँ सम्झौता गरिनुपर्ने अध्यक्ष पशुपतिशम्शेर राणाले बताए । उनले भने, “पूर्ववर्ती सरकारले परस्पर बाझिने सम्झौता गरेकाले स्थिति बिग्रिएको हो, यसलाई मिलाउन वार्ता गरी समस्याको समाधान गरिनुपर्छ ।”

मुलुकले एकथान संविधान मात्र नभई सदियौँदेखि उत्पीडनमा परेका वर्गको मुक्ति हुने संविधान खोजेकाले त्यस दिशामा अघि बढ्न पार्टीले ठूला दलहरुलाई आग्रह गरेको छ ।

मधेस र थारुहटको मागलाई सम्बोधन गरी मधेसमा दुई प्रदेशको व्यवस्था गर्न माग गरिएको प्रवक्ता ठाकुरप्रसाद शर्माले बताए । “संविधान घोषणाको तयारीमा रहेका बेला सबै पक्षले सामाजिक सद्भाव, मेलमिलाप र एकता कायम राख्न आ–आफ्ना स्थानबाट सहयोगका लागि अपिल गर्दछौँ,” प्रवक्ता शर्माको भनाइ थियो ।