जनकपुरमा अनिश्चितकालिन निषेधित क्षेत्र घोषणा, बीरगन्जमा जनजीवन सामान्य

जनकपुरधाम, १७ भदौ । जिल्ला प्रशासन कार्यालय धनुषाले अनिश्चितकालका लागि जनकपुरका केही भागमा निषेधित क्षेत्र घोषणा गरेको छ ।

जनकपुरमा तनाब बढेपछि स्थानीय प्रशासनले सरकारी कार्यालयलाई लक्षित गरी केही ठाउँलाई निषेधित क्षेत्र घोषणा गरेको हो ।

स्थानीय मुरलीचोकदेखि कदमचोकसम्म, स्वर्गद्वारीस्थित भूतनाथ मन्दिरदेखि जिल्ला अदालत जाने बाटो र उत्तीमपुरस्थित कोष तथा लेखा नियन्त्रण कार्यालयदेखि आन्तरिक राजस्व कार्यालय जानेबाटोलाई निषेधित क्षेत्र घोषणा गरिएको प्रमुख जिल्ला अधिकारी कालीप्रसाद पराजुलीले जानकारी दिए ।

कसैले निषेधित क्षेत्र तोडे गोलीसमेत प्रहार गर्न सक्ने प्रमुख जिल्ला अधिकारी पराजुलीले जानकारी दिए ।

बीरगन्जमा निषेधाज्ञाको समय घटेपछि जनजीवन सामान्य

जिल्ला प्रशासन कार्यालय पर्साले वीरगन्ज नगर क्षेत्रमा लगाएको निषेधाज्ञाको समय घटाएपछि जनजीवन केही सामान्य बनेको छ ।

निषेधाज्ञाको समय घटाएसँगै वीरगन्जमा सर्वसाधारणको चहलपहल एक्कासी बढेको देखिएको छ । स्थानीय प्रशासनले वीरगन्जमा आज साँझ ५ बजेदेखि ७ बजेसम्म निषेधाज्ञा फुकुवा गरेपछि जनजीवन सामान्य बनेको हो ।

निषेधाज्ञाको समय छोट्याउँदै स्थानीय प्रशासनले वीरगन्जमा आज साँझ ७ बजेपछि पुनः अर्को आदेश नभएसम्मका लागि निषेधाज्ञा यथावत राखिएको पर्साका प्रमुख जिल्ला अधिकारी केशवराज धिमिरेले बताए ।

सीमाङ्कनप्रति असन्तुष्टि जनाउँदै मधेस केन्द्रित दलहरूले गरेको अनिश्चितकालीन मधेस बन्दका क्रममा स्थानीय प्रशासनले जारी गरेको निषेधाज्ञा र दङ्गाग्रस्त क्षेत्र घोषणाका कारण चार दिनदेखि पर्साको जनजीवन अत्यन्त कष्टकर बनेको थियो ।

त्यस्तै १९ दिनदेखिको लगातार बजार, पसल, यातायात, कलकारखाना, शिक्षण संस्था, बैंक तथा वित्तीय संस्थाहरू बन्द हुँदा सर्वसाधारणलाई समस्या भएको छ ।

प्रतिक्रिया

सम्बन्धित सामाग्री