गेसो सभापति पदमबहादुर गुरूङ
लन्डन । गोरखा भूतपूर्व सैनिक संघ (गेसो) तेस्रो महाधिवेसनको तयारीमा जुटेको छ ।
लामो समय बेलायतसित गोरखाहरूको समान हक स्थापनाका लागि नेतृत्वदायी आन्दोलन गरेको गेसो केही समययता मौन थियो ।
गेसो सभापति पदमबहादुर गुरूङले गोरखा सैनिक आवाज मासिकसितको अन्तरवार्तामा तेस्रो महाधिवेसनपछि गेसो आन्दोलन नयां चरणमा प्रवेश गर्ने बताएका छन् ।
‘गत वर्षको चैत २५ गते हाम्रो कार्यकाल सिद्धिएको छ । अब हामी तेस्रो महाधिवेसनको तयारीमा छौं’ उनले भनेका छन् ।
धेरै गोरखाहरू बेलायतमा बसोबास गरिरहेकाले तेस्रो महाधिवेसन बेलायतमा नै गरिने उनले बताए ।
उनले बेलायतमा भूपू सैनिकहरूको आवादीको आधारमा जिल्लास्तरीय समितिहरू गठन गर्ने र उनीहरूकै प्रतिनिधित्व रहने गरी नयां केन्द्रीय समिति बनाइने पनि जानकारी दिए ।
उनले तेस्रो महाधिवेसनबाट पुनः सभापतिको जिम्मेवारी लिन नचाहेको पनि प्रष्ट पारे । तर नेतृत्व नलिने पूरै इन्कार भने गरेनन् । ‘यसपटक भरसक मैले नयां नेतृत्व अथवा नयां पुस्ताले यो अभिभारा बहन गरुन् भन्नेमा छु । मेरो उमेर अहिले ७३ वर्ष पुगिसक्यो । नयां जोश र जांगरले नयां पुस्ता गेसोमा सेवा गर्न आओस् भन्ने मेरो पवित्र इच्छा छ’ उनले भने ।
बेलायतमा भूपू गोरखाहरूको बसोबासका आधारमा स्थानीय समिति चयन गर्न सभापति गुरूङ, उपसभापति कृष्णकुमार राई र सल्लाहकार डा. चन्द्रबहादुर गुरूङ रहेको समिति बनाइएको छ ।
महाधिवेसनपछि गेसोले नेपाल र नेपालीको स्वाभिमानको प्रतीक साल्मेडांडामा बन्न लागेको स्मारकलाई पूर्णता दिने, नेपाल सरकार र बेलायत सरकारलाई अहिलेको परिवर्तित अवस्था अनुसार नयां द्विपक्षीय सम्झौता गर्न दवाव दिने र गोरखाहरूलाई नेपाल र बेलायतमा बराबर अधिकार दिलाउन पहल गरिने उनले थपे ।
