लन्डन । एनआरएनए यूकेको निर्वाचन आगामी १३ सेप्टेम्बर २०१५ का दिन साउथ इष्ट लन्डनको ग्रीनवीच क्षेत्रमा हुने भएको छ । यसअघि २० सेप्टेम्बरमा गर्ने तय भएपनि अन्तर्राष्ट्रिय समन्वय परिषद (आइसीसी) ले १५ सेप्टेम्बरभित्रै गर्न निर्देशन दिएपछि आइतबार एनआरएनए यूके पदाधिकारी बैठकले उक्त निर्णय गरेको हो ।
बिहान दश बजे शुरु हुने सभा र निर्वाचन स्थानचाहिं बुकिंगपछि जानकारी दिइने संघले जनाएको छ ।
बैठकले निर्वाचन तालिका समेत प्रकाशित गरेको छ । जस अनुसार निर्वाचन प्रयोजनका लागि मतदान गर्ने अधिकार सहितको पंजीकृत सदस्यता नवीकरण र नयां आवेदन गर्ने अन्तिम मिति १५ अगस्ट सांझ ६ बजे सम्म, प्रथम मतदाता र सदस्यहरुको नामावली प्रकाशन २४ अगस्त, सांझ ५ बजे सम्म, प्रथम प्रकाशित नामावली माथि दावी विरोध गर्ने म्याद २५ अगस्त सांझ ५ बजे सम्म तोकिएको छ ।
त्यसैगरि, अन्तिम मतदाता सदस्य नामावली प्रकाशन गर्ने
अन्तिम मिति २८ अगस्त दिनको २ बजे सम्म, सदस्यता मतदाता नामावली र निर्वाचन निर्देशिका सहित निर्वाचन समितिलाई हस्तान्तरण गर्ने मिति २८ अगस्त दिनको ४ बजे सम्म निर्धारण गरिएको छ ।
बैठकले निर्वाचन समितिले गैर आवासीय नेपाली संघ बेलायतको कार्यसमितिले निर्देशन गरेको निर्वाचन निर्देशिका र अन्तर्राष्ट्रिय परिषदले जारी गरेको निर्वाचन निर्देशिकाको अधिनमा रहि निष्पक्ष, तटस्थ र निर्वाचनलाई प्रभाव पार्ने कुनै पनि काम नगरी समयमै निर्वाचन गर्न पनि निर्देश गरेको छ ।
बैठकले अध्यक्ष पदका लागि उम्मेदवारी शुल्क एकहजार पाउण्ड तोक्दै त्यो फिर्ता नहुने निर्णय गरेको छ । त्यसैगरि, उपाध्यक्षमा लड्न ७५० तोकिएको छ भने महासचिव, सचिव, कोषाध्यक्ष, प्रवक्ता, युवा संयोजक, महिला संयोजकको शुल्क ५ सय पाउण्ड निर्धारण गरिएको छ । सदस्यहरुका लागि उम्मेदवारी शुल्क ३ सय र आइसीसी प्रतिनिधिका लागि एक हजार पाउण्ड तोकिएको छ ।
त्यस्तै, सदस्यता नवीकरण र नयां आवेदनका लागि यस अघि प्रकाशित सूचना अनुसार नै हुने तर नवीकरण प्रयोजनका लागि पुरानो सदस्यता नम्बर उल्लेख गर्नुपर्ने, फोटो र जन्म मिति आवश्यक नपर्ने गरी सहजीकरण गरिएको छ । सदस्यता शुल्क बैंक दाखिला नभएमा (चेक फिर्ता वा बाउन्स भएमा) उक्त सदस्यको नामावली मतदाता सूचीमा प्रकाशन नगरिने र मतदान अधिकार नहुने बैठकको निर्णय छ ।
बैठकले ६ सेप्टेम्बरमा च्यारिटी कार्यक्रम गर्ने निर्णय गर्दै उपाध्यक्ष कृष्ण तिमिल्सिनालाई संयोजक तोकेको छ ।
फाइल तस्विर
