लन्डनस्थित पशुपतिनाथ मन्दिरमा महायज्ञबाट ४५ लाख

लन्डन । नेपालका भूकम्प पीडितका लागि शान्तिको कामना गर्दै साउथ इस्ट लण्डनको प्लमस्टिडस्थित पशुपतिनाथ मन्दिरमा तीन दिने महायज्ञ सम्पन्न भएको 
छ । महायज्ञबाट २८ हजार पाउण्ड (झन्डै ४५ लाख रुपैयां ) चन्दा संकलन समेत भएको छ । नेपाली समुदायबाट स्थापित युरोपकै पहिलो यो हिन्दू मन्दिरको पांचौ वार्षिकोत्सवका अवसरमा महायज्ञ गरिएको हो । गत शुक्रबार सुरु महायज्ञ पूजा पाठ, प्रवचन, भजन किर्तन लगायत विविध कार्यक्रम गर्दै आइतबार समापन भएको छ । उक्त महायज्ञमा बेलायतका विभिन्न क्षेत्रबाट हजारौं नेपाली सहभागी भए ।

उक्त अवसरमा चन्दा दाताहरुलाई सम्मान समेत गरिएको थियो । ५ हजार पाउण्ड भन्दा माथिको सहयोग गर्नेहरु स्थानीय कृष्ण क्षेत्री (५ हजार ५ सय ), पत्रकार फडिन्द्र भट्टराई ( ५ हजार १ सय ५१ ), व्यवसायी दिपक श्रेष्ठ (५ हजार) र मिलन भट्टराई (५ हजार) मन्दिरको ट्रस्टी समूहमा प्रवेश गरेको मन्दिर व्यवस्थापनले जनाएको छ । आयव्ययको पूर्ण विवरण पश्चात संकलित रकमको अंश नेपालमा भूकम्पले क्षति पुगेका ऐतिहासिक मन्दिरको पुनस्र्थापना तथा जिर्णोद्वारमा लगाइने आयोजकले बताएका छन् ।

पहिलो दिन पण्डित निलहरी घिमिरे र मन्दिर समितिका अध्यक्ष होम शर्माले मन्दिरको गेटमा रिवन काटेर महायज्ञ उद्घाटन गरेका थिए । मन्दिरभित्रको सामूहिक संकल्पबाट शुरु भएको यज्ञमा नवग्रह पूजा, सत्य नारायण पूजा, रुद्राभिषेक, रुद्री बेद चण्डी वाचन, सामूहिक पुर्णाहुति जस्ता वैदिक कार्यक्रम सञ्चालन भएको जानकारी महायज्ञ संयोजक पण्डित निलहरी घिमिरेले दिए ।

त्यसैगरि प्रत्येक दिनको सामूहिक आरती, प्रसाद वितरण पश्चातको सांस्कृतिक भजन किर्तन, नाचगान आकर्षक देखिन्थ्यो । अन्तिम दिनको कार्यक्रममा गुरुकुलका आमन्त्रित साधुहरु भक्त बत्सल स्वामी तथा भक्ति बेदान्त स्वामीद्वारा पुर्णाहुति विशेष हवन पश्चात प्रवचन दिइएको थियो भने प्रत्येक दिन सांझ लक्षबर्ती प्रज्वलन गरिएको थियो । कार्यक्रममा चार जना पण्डित निलहरी घिमिरे, कमल लुईंटेल, विनोद पन्थी र दधिराम काफ्लेद्वारा पुजा सञ्चालन गरिएको थियो । त्यस्तै मन्दिरभित्रको देवालय सरिता पौडेल, तुलसा शर्मा लगायत महिलाबाट उद्घाटन गरिएको छ ।
सपरिवार महायज्ञमा पुगेका बेलायतवासी नेपालीहरु यो विशेष पूजाआजाको माहोलमा निकै रमेका देखिन्थे । पूजामा मात्रै केन्द्रित भन्दा पनि नयां पुस्ताका केटाकेटीलाई नेपाली संस्कार र परम्परामा घुलमिल गराउने अवसरको रुपमा यस्तो कार्यक्रमको महत्व बढि हुने महायज्ञमा पुगेका अधिकांश सहभागीले बताए । महायज्ञको आन्तरिक व्यवस्थापनमा महिला स्वयंसेविकाहरुको विशेष सक्रियता देखिन्थ्यो ।
बेलायतमा बस्ने नेपालीहरुले भावी पुस्तालाई आफ्नो धर्म र संस्कारप्रति कसरी जोडी राख्ने भन्ने तर्फ केन्द्रित रहंदै आफ्नो परम्परा अनुसारका यस्ता कार्यक्रमहरु आयोजना गर्दै आएको पाइन्छ ।
नेपालका धार्मिक पर्वहरुमा विशेष पूजा सञ्चालन हुने यो लण्डनको नेपाली मन्दिरमा आवासीय पूजारीले दैनिक नित्य पुजा समेत संचालन गर्दै आएका छन् । मन्दिरमा दशैं तीज लगायतका चाडपर्वमा स्थानीय नेपालीहरुको घुईंचो लाग्ने गरेको छ ।