क्याट अध्यक्षमा श्रेष्ठ निर्विरोध

लन्डन । चितवन एड ट्रष्ट (क्याट) यूकेको अध्यक्षमा वसन्त श्रेष्ठ निर्विरोध निर्वाचित भएका छन् । आइतबार लेक साइड कम्प्लेक्स् एबीउडमा सम्पन्न ११ औं वार्षिक साधारणसभा तथा छैटौं अधिवेशनले श्रेष्ठको नेतृत्वमा १८ सदस्यीय कार्यसमिति सर्वसम्मत चयन गरेको हो ।

नयां कार्यसमितिको वरिष्ठ उपाध्यक्षमा सूर्य तामाङ र उपाध्यक्षहरुमा देवेन्द्र श्रेष्ठ, सुनील खडका, रितेश पाण्डे र भगवती रानाभाट छानिएका छन् । त्यस्तै, सचिवमा यादव श्रेष्ठ, कोषाध्यक्ष समीर खनाल, सहसचिव जीवन सेन, र सहकोषाध्यक्षमा तारा पौडेल चुनिएको संस्थाले जनाएको छ ।

अधिवेशनले सदस्यहरुमा मुना पौडेल, राम भट्टराई, दिपेन्द्र अधिकारी, विनय अधिकारी, आनन्द धरेल, शालिक सापकोटा, हरिकृष्ण पौडेल र पार्वती न्यौपानेलाई चुनेको छ ।

नयां नेतृत्व चयनका लागि संस्थाका पूर्व अध्यक्षहरु लोक गुरुङ र राजेन्द्र खरेल तथा उपाध्यक्षद्धय कमल पौडेल र टिका पौडेल सम्मिलित एउटा निर्वाचन समिति गठन गरिएको थियो ।

यसअघि संस्थाका अध्यक्ष कृष्ण गुरुङको अध्यक्षता र गैर आवासीय नेपाली संघ, बेलायतका अध्यक्ष महेन्द्र कंडेलको प्रमुख आतिथ्यमा सम्पन्न 
उद्घाटन सत्रमा क्याट यूकेले गरेका विविध गतिविधिबारे जानकारी दिइयो । सो क्रममा अध्यक्ष गुरुङले बेलायतमा रहेका चितवनवासीहरुलाई एकत्रित र आपसी सद्भाव प्रवर्धन गर्ने उद्देश्यले सन् २००४ मा संस्था गठन गरिएको जानकारी दिए । उनले संस्थाले चितवनका धेरै दुर्गम गाउंमा विभिन्न परोपकारी काम गर्दै आएको जनाउंदै भूकम्पबाट क्षतिग्रस्त संरचना पुनर्निर्माणका लागि २२ हजार पाउण्ड संकलन भइसकेको जनाए ।

महासचिव सूर्य तामाङले सञ्चालन गरेको उक्त कार्यक्रममा उपाध्यक्ष कृष्ण तिवारीले संस्थामार्फत कविलास गाविस ९ स्थित भूकम्पले क्षतिग्रस्त ढोढेनी राष्टिय प्राविको पुनर्निर्माणका लागि २२ लाख रुपैयांको परियोजना तयार गरिएको जनाए । तिवारीले संस्थाको तर्फबाट १४ लाख, आफ्नो व्यक्तिगत तर्फबाट तीन लाख रुपैयां एवं बांकी क्याट यूके पदाधिकारीहरुबाट ५ लाख रुपैयां संकलन गरि स्थानीय निकायको समन्वयमा परियोजना सञ्चालन गरिने जनाए ।

सोही अवसरमा उक्त परियोजनाका लागि तारा अर्याल र गैर आवासीय नेपाली संघ, बेलायतका अध्यक्ष महेन्द्र कंडेलले ५०, ५० हजार रुपैयां दिने प्रतिवद्धता व्यक्त गरेका छन् । वार्षिक साधारणसभामा कोषाध्यक्ष देवेन्द्र श्रेष्ठले आर्थिक प्रतिवेदन पेश गरेका थिए ।

संस्थाका संस्थापक अध्यक्ष कपिल श्रेष्ठ र एनआरएनए यूके अध्यक्ष महेन्द्र कंडेलले उद्घाटन गरेको उक्त कार्यक्रमको दोश्रो चरणमा नीरमाया रोधीघर आवद्ध कलाकारहरुले विभिन्न सांस्कृतिक प्रस्तुति दिएका थिए ।

यसैबीच, संस्थाले भूकम्प पीडित पत्रकारका लागि तीनसय पाउण्ड दिने प्रतिवद्धता व्यक्त गरेको छ ।