बुधबार, मंसिर १० २०७७ | Wed, November 25, 2020
नेपालको समय: १३:४२ | UK Time: 07:57

आयरल्याण्डमा नेपाल घुम्न योग्य भएको सुनाउंदै दूतावास

वीनेपाली
२०७२ असार २९ गते १२:०४

 

20150713_192829

लन्डन । लन्डनस्थित नेपाली दूतावासले सोमबार आयरल्याण्डको डब्लिनमा पर्यटन प्रवर्धन कार्यक्रम गरेको छ । महाभूकम्पपछि नेपालको पर्यटन प्रवर्धन एवं पर्यटकका लागि नेपाल योग्य गन्तव्य हो भन्ने प्रचार प्रसार गर्न कार्यक्रम गरिएको हो ।

आयरल्याण्डको पुरानो संस्था नेपाल आयरल्याण्ड समाजको 
संयोजकत्वमा भएको उक्त समारोहमा डब्लिन लर्ड मेयर काउन्सिलर ग्रेग केल्ली 
प्रमुख आतिथी थिए । समारोहमा सहभागी नेपालप्रेमी आइरिसहरुबीच नेपालको पर्यटनबारे वृहत अन्तरक्रिया भयो ।

उक्त समारोहमा आयरल्याण्ड र संयुक्त अधिराज्य बेलायतका लागि कार्यवहाक राजदूत तेजबहादुर क्षेत्रीले स्वागत मन्तव्य दिंदै भूकम्पपछि नेपाल सरकारको पर्यटन अवधारणा प्रस्तुत गरे । क्षेत्रीले हालसम्म आइरिस समुदाय र सरकारले गरेको सहयोग र 
सद्भावका लागि नेपाल सरकार र आयोजकका तर्फबाट धन्यवाद दिंदै नेपाल घुम्न योग्य छ भन्ने सन्देश प्रवाह गरिदिन आग्रह गरेका थिए ।

नेपाल आयरल्याण्ड समाजका अध्यक्ष तथा आयरल्याण्डका लागि पर्यटन बोर्डका प्रतिनिधि दीपेशमान शाक्यले हालैको भूकम्पले गरेको पर्यटकीय तथा मानवीय क्षति सम्बन्धि विवरण कम्प्युटर प्रोजेक्टरमार्फत प्रस्तुत गरे । उनले नेपालको केही पर्यटकीय स्थलमामात्र क्षति भएको र बांकी अधिकांश क्षेत्र भ्रमण योग्य भएको अवगत गराए ।

कार्यक्रममा आइरिस सरकारका पूर्व विदेश राज्यमन्त्री तथा वर्तमान सांसद जो कोस्तेल्लोले नेपालमा भूकम्पको कारणले भएको धनजनको क्षतिप्रति चिन्ता व्यक्त 
गर्दै नेपाल र नेपाल सरकारको सहयोगका लागि सरकारी तवरबाट पहल गर्न आफू लागि पर्ने प्रतिवद्धता व्यक्त गरे । उनले नेपाल सरकार र आइरिस सरकारसंग दुई देशबीच आर्थिक, सामाजिक र राजनैतिक रुपमा पारस्परिक सम्बन्ध विकास गर्न आइरिस संसदमा एक संसदीय टिम खडा गर्ने प्रतिवद्धता समेत व्यक्त गरे ।

अलिसोन इर्विनले सञ्चालन गरेको उक्त कार्यक्रममा पूर्व डब्लिन लर्ड मेयर तथा यूरोपियन संसद सदस्य एमर कोस्तेल्लो र लर्ड मेयर काउन्सिलर ग्रेग केल्लीले नेपालको पर्यटन विकासप्रति चासो राख्दै यसका लागि व्यक्तिगत तथा संस्थागत सहयोग गर्न तयार रहेको बताएका थिए ।
उक्त कार्यक्रममा नेपाल आयरल्याण्ड समाजका महासचिव गंगाराम कंडेलले धन्यवाद मन्तव्य दिए ।
यसैबीच, कार्यवहाक राजदूत क्षेत्री आइरिस सरकारको निम्तोमा त्यहांको स्वतन्त्रता दिवसमा आयोजित स्मृति सभामा सहभागी भए । साथै उनले विदेश मन्त्रालय अन्तर्गतको एसिया प्यासिफिक क्षेत्रकी निर्देशक मिव कोलिन्स्संग भेटवार्ता समेत गरे ।

DSC01920

प्रतिक्रिया

सम्बन्धित सामाग्री

फेसबुक