लन्डन । वेम्ली एरिनामा पहिलोपटक नेपाली कन्सर्ट गरेर दर्शक मन अत्यधिक जितेको नेपथ्य व्याण्ड आफ्नो नयां एल्बमसहित पुनः लन्डन आउने भएको छ । नेपथ्य लन्डन झिकाउन लागेको इलाइट्स क्रुले आइतबार एक पत्रकार सम्मेलनमा उक्त जानकारी दिएको हो । नेपथ्यको नयां एल्बमसमेत कन्सर्टकै बेला विमोचन गराउने इलाइट्स क्रुको योजना छ ।
आगामी ८ अगष्ट सांझ ओटु एकेडेमी ब्रिक्सटनमा कन्सर्ट हुन लागेको आयोजकले जनाएका छन् । मध्य लन्डनमा अवस्थित उक्त स्थान ‘इन्डोर भेन्यू’ का लागि विश्व प्रख्यात छ ।
राती ८ देखि ११ बजेसम्म हुने कन्सर्टमा नेपथ्यले नयां पुराना गीत गाउने अपेक्षा छ । वालवालिकादेखि वृद्धसम्मका सबै दर्शकलाई लक्षित गर्दै कन्सर्ट गर्न लागिएको आयोजकको भनाइ छ ।
आयोजकका तर्फबाट पवन गुरुङ, एलबीजेड गुरुङले सञ्चारकर्मीको जिज्ञासा मेटाउंदै कलाकारहरुको भिजा गत सातानै अप्लाइ भइसकेको जनाए । कन्सर्टको विक्री प्रति टिकेटबाट २५ पेन्स् च्यारिटीमा खर्च गर्ने इलाइट्स क्रुले जनाएको छ ।
नेपथ्य यसअघि पनि लन्डन आइसकेको, हालै दि रोयल अल्बर्ट हलको कन्सर्ट समेत आधाजसो खाली भएकामा नेपथ्यले अब पाउने दर्शकबारे राखिएको जिज्ञासामा आयोजकले उनीहरुको ब्रान्ड र नयां गीत समेत हुने भएकाले कार्यक्रम सफल हुने विश्वास व्यक्त गरेका छन् । कन्सर्ट लगत्तै रातभर पार्टी समेत हुने इलाइट्स क्रुले जनाएको छ ।
इलाइट्स क्रुले गत डिसेम्बरमा मात्र युवामाझ चर्चित गायक दिव्या सुब्बा र रक ब्याण्ड अल्बाट्रोसलाई पहिलोपटक लन्डन ल्याएर ट्रोक्सीमा सफल कन्सर्ट गरेको थियो ।
पत्रकार सम्मेलनमा इलाइट्स क्रु आवद्ध एलबीजेड गुरुङ, म्याक्सी गुरुङ, विजय गुरुङ, सुरज सिंह, सन्जय पुन, पवन गुरुङ लगायत सहभागी थिए ।
