ग्रीनवीच कप २ अगष्टमा

 

लन्डन । पांचौं ग्रीनवीच कप आगामी २ अगष्टमा हुने भएको छ । साउथ इष्ट रिजनल तमुधिं लन्डन र नेपाली युथ एसोसिएसन यूकेले संयुक्त रुपमा ग्रीनवीच कप गर्न लागेका हुन् ।

आइतबार गोर्खा क्लव प्लमस्टिडमा आयोजित पत्रकार सम्मेलनमा आयोजकले रोयल आर्टिलरी ब्यारेक्स्, उलवीचमा कप हुने जनाए । प्रथम हुने टिमलाई १५ सय पाउण्ड पुरस्कार तोकिएको उक्त कपमा भलिवल प्रतियोगिता समेत एकसाथ हुने जनाइएको छ । भलिवल एकसाथ हुन लागेको यो वर्ष दोश्रो हो । आयोजकले फुटबल प्रतियोगितामा करिब दुई दर्जन र भलिवलमा कम्तीमा ४ टिम सहभागी हुने अपेक्षा व्यक्त गरेका छन् ।

आयोजक मध्ये एक नेपाली युथ एसोसिएसन यूकेका अध्यक्ष हरि गुरुङले प्रतिभावान युवाहरुलाई अवसर प्रदान गर्न प्रतियोगिता आयोजना गरिएको जनाए । ‘प्रतियोगितामा सबै क्षेत्र र वर्गलाई ढोका खुल्ला छ’, गुरुङले जनाए ।

साउथ इष्ट रिजनल तमुधिं लन्डनका अध्यक्ष श्रीचन्द्र गुरुङले युवाहरुलाई कुलततिर लाग्नबाट रोक्न यस्ता प्रतियोगिता उपयोगी हुने विश्वास व्यक्त गरे ।

पत्रकार सम्मेलनमा ग्रीनवीच कपका संयोजक साइजल गुरुङ र सुमन गुरुङले प्रतियोगिता तयारीबारे अवगत गराएका थिए ।

ग्रीनवीच क्लवले सन् २०११ देखि शुरु गरेको ग्रीनवीच कप पछि नेपाली युथ एसोसिएसन यूकेले जिम्मा लिएको हो ।