बिहीबार, असोज १५ २०७७ | Thu, October 01, 2020
नेपालको समय: ०७:५५ | UK Time: 03:10

२५ वर्ष अघि नेपाल छाडेका खराल ८ वर्ष यता बेलायतमा सम्पर्कविहीन

वीनेपाली
२०७२ असार १० गते १६:३१

11270137_10204471144967505_572547052_n

लन्डन । आम नेपालीको सपनाको देश बेलायत । यहां आएर आफ्नो भविष्य सुनौलो बनाउन लालयित नेपाली असंख्य छन् । करिब १८ वर्ष अघि यस्तै सुन्दर भविष्य कल्पेर बेलायत उत्रिएका गुल्मी आंपचौरका आनन्द खरालको भविष्य त परै जाओस्, अवस्था नै अत्तो पत्तो नहुंदा परिवार विक्षिप्त छ ।

वि.स. २०४७ अर्थात २५ वर्ष अघि नेपाल छाडेर जर्मनी, बेल्जियम हुंदै करिव 
१८ वर्ष अघि लन्डन उत्रिएका आनन्दले पछिल्लोपटक सन् २००८ मा परिवारलाई टेलिफोन सम्पर्क गरेका थिए । तर, त्यसयता उनी सम्पर्कविहीन भएको भान्जा खोज्दै यहां आइपुगेका मामा लेखनाथ घिमिरेले वीनेपालीलाई जनाए । सम्पर्कमा आउंदा आनन्दले आफू लन्डनमा सेफको काम गर्ने गरेको र लन्डन बेटरसी पार्क तथा पट्नीमा बस्ने बताएका थिए ।

‘जिउंदो, मरेको केही थाहा भएन । हामीलाई केवल एक कल फोन गरेर आफ्नो अवस्थामात्र भनिदिए पनि पुग्थ्यो’, आफ्नी श्रीमतिका साथ महिनादिन अघि भान्जा खोज्न यहां आएका घिमिरेले चिन्ता व्यक्त गर्दै भने ।

हाल हेस्टिंग बसिरहेका घिमिरेले यहां आएर इष्टमित्र, साथीभाइ र नेपाली समुदायमा भान्जा खोजीदिन अपिल गरिरहेका छन् । प्रहरीतिर भने शिकायत नगरिएको उनले जनाए ।

गहुंगोरो र खाइलाग्दा अन्दाजी ४३ वर्षीय आनन्दको अज्ञात अवस्थाले बाबु आमा, एकजना दाई र दुई बहिनी विक्षिप्त छन् ।
पुर्खौली घर गुल्मी आंपचौर भएका खरालको परिवार यतिबेला दिव्यपुरी ३ केउरेनी नवलपरासीमा छ । बाबु हिरालाल खराल वरिष्ठ समाजसेवीका रुपमा गाउंमा नाम चलेका व्यक्ति हुन् । बेलायतमा बेपत्ता आफ्ना छोरा सम्झेर उनकी आमा नारायणी खराल दिनरात आंशुमा डुबेकी छन् । बाबा पक्षघातले हिंडडुल गर्न सक्दैनन् । विरामी बाबु छोरा सम्झंदै ओछ्यानमा रोएर बसिरहेको घिमिरेले बताए । हिरालालका दुई छोरामध्ये जेठो छोरा श्याम खराल नेपालमै उच्चमाविका शिक्षक छन् ।

आनन्दलाई नजिकबाट चिन्ने नवलपरासीका शिक्षक यादव पौडेलका अनुभवमा साथीभाइमाझ अति मिलनसार खराल बेटिङ (जुवाघर)  लतमा भने थिए ।

प्रतिक्रिया

सम्बन्धित सामाग्री

फेसबुक