लन्डन । इलिङस्थित मन्टिज रेष्टुरेन्ट र खुकुरी बियरले भूकम्प पीडितलाई ७ हजार ६ सय ४१ पाउण्ड प्रदान गरेको छ । सोमबार मन्टिजमा आयोजित एक कार्यक्रमबीच संकलित रकम रेष्टुरेन्ट सञ्चालक महन्त श्रेष्ठले अक्सफाम हेड अफ रिजनल फण्ड रेजिङ एलिस बाइरनलाई हस्तान्तरण गरेका हुन् ।

चेक ग्रहणपछि बाइरनले श्रेष्ठ र अन्य दाताहरुप्रति आभार व्यक्त गर्दै अक्सफामले भूकम्प अति प्रभावित काठमाण्डौं, ललितपुर, भक्तपुर, गोरखा, सिन्धुपाल्चोक, नुवाकोट र धादिङ गरि ७ जिल्लामा जुन महिनाको अन्तिमसम्म ४ लाख मानिसलाई अत्यावश्यक राहत  उपलव्ध गराउने लक्ष्य लिएको बताइन् ।

अक्सफामले विशेष गरि शौचालय निर्माण, पिउने पानी, जिवाणु फैलनबाट रोक्न हाउजिन किट्स लगायतमा खर्च गरिरहेको छ ।

मन्टिज रेष्टुरेन्टले भूकम्पपछि च्यारिटी डिनर कार्यक्रम आयोजना गरेको थियो । सञ्चालक श्रेष्ठले विपत्तिमा सानै भएपनि सहयोग गर्न पाउनु खुशीको कुरा भएको जनाए । श्रेष्ठकै लगानीमा बेलायतमा नेपाली खुकरी वियर उत्पादन हुंदै आएको छ ।