शनिबार, मंसिर १३ २०७७ | Sat, November 28, 2020
नेपालको समय: ०७:५४ | UK Time: 02:09

भूकम्प पीडितलाई सोडेक्सोको ६२ लाख सहयोग

वीनेपाली
२०७२ जेठ २२ गते ११:१८

sodexo_4c
लन्डन । एउटा अन्तर्राष्ट्रिय कम्पनी सोडेक्सोले नेपालका भूकम्प पीडितलाई ५० हजार यूरो (करिब ६२ लाख रुपैयां) सहयोग गरेको छ ।
वार्षिक १.१ अरब पाउण्ड बढिको व्यापार गर्ने उक्त कम्पनीले भोकमरी विरुद्ध लड्दै आएको विश्वकै सबैभन्दा ठूलो मानवीय सहायता एजेन्सी वोर्ल्ड फुड 
प्रोग्राम (डब्लुएफपी) को साझेदार स्टप हङ्गर च्यारिटीलाई उक्त सहयोग प्रदान गरेको 
जनाएको छ । यस अतिरिक्त कम्पनीको रक्षा विभागमा कार्यरत कर्मचारीले अलग्गै ६ हजार ४४२ पाउण्ड (दश लाख रुपैयां बढि) डिजास्टर इमर्जेन्सी कमिटीमार्फत पीडितलाई दिएका छन् । यस कम्पनीको बेलायत र आयरल्याण्डमा ३५ हजार बढि कर्मचारी छन् । संसारभर तीन लाख भन्दा बढी कर्मचारी भएको सोडेक्सो ग्लोबल भनेर चिनिने उक्त कम्पनी फ्रान्समा ६० को दशकमा स्थापना भएको हो ।

महाविपत्ति लगत्तै सोही कम्पनीमा काम गर्ने नेपाल हार्ट फाउण्डेशन यूकेका अध्यक्ष एवं साहित्यकार विकलचन्द्र आचार्यले सोडेक्सोको यूके तथा आयरल्याण्डकी कार्यकारी निर्देशक डेवी ह्वाइट समक्ष पीडितलाई सहयोग गर्न याचना गर्दै इमेल लेखेका थिए । डेवीले आचार्यको अनुनय कर्पोरेट चियरम्यान फिल हुपर समक्ष पुर्याएको तीनदिनपछि हुपरले भूकम्प पीडितलाई 
कम्पनीको तर्फबाट पचास हजार यूरो सहयोग गर्ने प्रतिवद्धता व्यक्त गरेका 
थिए । आचार्यले आफ्नो सानो पहलले यत्ति ठूलो सहयोग जुटेकामा खुशी व्यक्त गर्दै दाताहरुप्रति आभार व्यक्त गरेका छन् ।

स्टप हङ्गरले पीडितलाई हालसम्म चामल, सुख्खा खाद्य सामाग्री र तीस लाख भन्दा बढि इनर्जीयुक्त बिस्कुट प्रदान गरिसकेको छ । उसले ६० हजार वालवालिका, तिनका आमा र गर्भवती महिलाका लागि पौष्टिक आहार दिन पनि प्राथमकिता दिइरहेको उल्लेख गरेको छ । स्टप हङ्गरको पार्टनर डब्लुएफपीले नेपाल सरकारको सहकार्यमा २.३ टन अत्यावश्यक सामाग्री जस्तो टेन्ट, औषधि, पानी शुद्ध गर्ने चक्की आदि पीडितसमक्ष प्रदान गरिसकेको छ । यो तौल ७० कार्गो जहाज बराबर हुन आउंछ । यो सहायता एजेन्सीले हिमाली क्षेत्रमा रहेका बीस हजार शेर्पा र पर्वतारोहण पेशामा आवद्ध सहायताकर्मीको साथ लिएर भूकम्प पीडितहरुको सहयोग गरेको थियो । २६७ गाउंमा १७ लाख मानिसले डब्लुएफपीको सहयोग पाइसकेका छन् ।

 

 

 

प्रतिक्रिया

सम्बन्धित सामाग्री

फेसबुक