लन्डन । नेपालका भूकम्प पीडितहरुको सहयोगार्थ दि काउन्सिल अफ एजियन पिपुलले सप्ताहन्तमा उडग्रीनस्थित एजियन सेन्टरमा एक च्यारिटी कार्यक्रम गरेको छ ।

उक्त च्यारिटीमा आकर्षण थियो प्रथम नौमती बाजा गुल्मी यूकेको पृथक धुन । नौमति बाजाको धुनमा नेपाली त झुम्मिन्छन् भने अंग्रेजहरु त्यसमा नरमाउने कुरै भएन । ओमप्रसाद थापाको नेतृत्वमा गएको समूहले मौलिक नेपाली बाजाबाट मनोरञ्जन दिलाएको हो ।

मौलिक नाचगानको रमझममा २८ सय १ पाउण्ड ६१ पेन्स संकलन भएको छ । उक्त च्यारिटीमा लन्डनस्थित नेपाली दूतावासका सैनिक सहचारी कर्णेल प्रदीपजंग केसी, होर्नसी एण्ड उडग्रीनकी नवनियुक्त सांसद क्याथरिन वेष्ट, स्थानीय काउन्सिलहरुसहित करिब दुई सय सहभागी थिए ।

सांसद क्याथरिनले नेपालको भूकम्पले नेपाल र बेलायती समुदायलाई एकवद्ध गराएको उल्लेख गर्दै यतिखेर नेपाल पुनर्निर्माण तथा पीडितका लागि उल्लेख्य आर्थिक सहयोग आवश्यक भएको बताइन् । संकलित रकम नेपाली दूतावासमार्फत प्रधानमन्त्री राहत कोषमा पठाइनेछ ।