लन्डन । विश्वकै सक्रिय क्रिकेट क्लव मानिन्छ लन्डन सेन्ट जोन्स् उडस्थित मार्लेबोन क्रिकेट क्लव (एमसीसी) । सन् १७८७ मा स्थापित उक्त क्लवको स्वामित्वमा क्रिकेटको घर अर्थात लर्डस् क्रिकेट मैदान छ । यसका १८ हजार पूर्ण तथा ५ हजार एसोसिएट सदस्यहरु छन् । त्यही प्रतिष्ठित क्लव एमसीसीले नेपालका भूकम्प पीडितका लागि २० हजार पाउण्ड भन्दा बढि संकलन गरेको छ । रोयल गोर्खा राइफल्स् प्रतिनिधिहरुको साझेदारीमा संकलित उक्त रकम गोर्खा वेल्फेयर ट्रष्ट अर्थक्वेक रेस्पोन्स् फण्डमा जानेछ । ट्रष्टले भूकम्प अति प्रभावित गाउंमा औषधि र अत्यावश्यक सहयोग उपलव्ध गराउंदै आएको छ ।
इंग्ल्याण्ड र न्यूजिल्याण्डबीच टेष्ट म्याचको तेश्रो दिनमा सहभागी दर्शकहरुले भूकम्प पीडितका लागि स्वतस्फूर्त सहयोग गरेका हुन् । ब्रिटिश अभिनेत्री जोआना लुम्लले ट्रष्टको च्यारिटी कार्यप्रति प्रशंसा गरेकी छन् । ट्रष्टले काठमाण्डौंबाट अति दुर्गम गाउंमा गएर उल्लेखनीय काम गरेको बताउंदै भूकम्पबाट विस्थापितहरुको सहयोगका लागि धेरै रकम चाहिएको लुम्लेले बताइन् ।
नेपालले क्रिकेटमा क्रमशः फड्को मार्दै गएका बेला नेपाल र मार्लेबोन क्रिकेट क्लवबीचको सम्वन्ध केही समय यता थप प्रगाढ बन्दै गएको छ । क्लवले नेपालको क्रिकेट विकासका लागि सहयोग गर्दै आएको छ ।
एमसीसीले नेपाल क्रिकेट टिमका क्याप्टेन पारस खड्कालाई अनुवन्ध गरेर गत मार्चमा दुवइमा आयोजित इमिरेट्स टि २० प्रतियोगितामा अवसर दिएको थियो । यस अतिरिक्त क्लव पदाधिकारी आगामी नोभेम्बरमा दुई साताको नेपाल भ्रमणमा जाने कार्यक्रम छ । तर, नेपालको वर्तमान अवस्थाका कारण भ्रमण के
गर्ने भन्नेबारे क्रिकेट एसोसिएसन अफ नेपालसंग परामर्श भइरहेको क्लवले जनाएको छ ।
