लन्डन । लन्डनको नर्थवेष्ट आसपासमा नेपाली र अन्य समुदायलाई सेवा दिंदै आएको योर ड्राइभिङ स्कुलले भूकम्प पीडितका लागि आर्थिक सहयोग गरेको छ । स्कुलले शुक्रबार ब्लु अर्किड रेष्टुरेन्टमा एक च्यारिटी डिनर गरि संकलित रकम एकहजार २९५ पाउण्ड नेपाली दूतावासमार्फत पीडितलाई प्रदान गरेको हो ।

कार्यक्रमका प्रमुख अतिथी लन्डनस्थित नेपाली दूतावासका थर्ड सेक्रेटरी बाबुकाजी डंगोललाई उक्त रकमको चेक हस्तान्तरण गरिएको हो । हस्तान्तरण गरिएको रकम दूतावासमार्फत प्रधानमन्त्री राहत कोष पुग्नेछ ।

स्कुलका सदस्य तथा अन्य आमन्त्रित गरि करिब एकसय ५० जना सहभागी च्यारिटी डिनरमा प्रमुख अतिथी डंगोल र स्कुलका वरिष्ठ सदस्य प्रसाद थेवेले भूकम्पमा दिवंगतहरुको सम्झनामा दीप प्रज्वलन गरेका थिए । उक्त अवसरमा स्कुलका सदस्य होमराज विष्टले स्वागत मन्तव्य सहित कार्यक्रम सञ्चालन गरेका थिए ।

हाल दश दक्ष सदस्य रहेको उक्त स्कुलले भविष्यमा पनि यस खालका सामाजिक काम गर्ने प्रण गरेको छ ।