कर्नवालबाट भूकम्प पीडितलाई १९ लाख रुपैयां

लन्डन । पर्यटकीय शहर कर्नवालको फालमाउथ निवासी एक नेपाली व्यवसायीले भूकम्प पीडितका लागि १९ लाख रुपैयां संकलन गरेका छन् । व्यवसायी हेमकान्त सेढाईंले फ़ल्मोउथस्थित बाल्टी करिज र  सेन्ट अस्टेलस्थित गोर्खा रेष्टुरेन्टमा च्यारिटी डिनर गरि त्यो रकम संकलन गरेका हुन् । १७ वर्षदेखि कर्नवाल बस्दै आएका सेढाईंले स्थानीय स्कुलमा खाना बनाएर समेत रकम संकलन गरेका थिए । च्यारिटीबाट करिब ५ हजार पाउण्ड बराबरको जिन्सी समेत संकलन भएको छ ।

सेढाईं आज शुक्रवार १६ लाख रुपैयां बोकेर नेपाल जांदैछन् । चितवन निवासी उनले आफूसंग रहेको पैसा कहां कसरी खर्चने भन्नेबारे नेपालमै सल्लाह गरेर प्रदान 
गर्ने जनाए । उनका साथ कर्निस् नागरिक जेसन मार्क विल्किन्सन पनि औषधिसहित नेपाल उड्दैछन् । नेपालप्रति हुरुक्कै हुने विल्किन्सन आफ्नै खर्चमा करिब ४० केजी औषधिजन्य सामान जस्तै सिटामोल, न्यूरोफेन, पानी सफा गर्ने ट्याब्लेट, टुथ पेष्ट, टुथ ब्रस, एन्टिसेप्टिक क्रिम, ब्यान्डेज् आदि लिएर नेपाल जान लागेका हुन् ।

भूकम्प आउंदा नेपालमै रहेका सेढाईंले यसअघि काभ्रेको वालुवामा करिब ५ लाख रुपैयां खर्च गरेको जनाए ।