प्रदीप नेपालले भिसा नपाएपछि कार्यक्रम स्थगित

लण्डन । साहित्यकार तथा नेकपा एमाले नेता प्रदीप नेपालको प्रमुख आतिथ्यमा लण्डनमा हुन लागेको एक साहित्यिक कार्यक्रम नेपालले भिसा नपाएपछि स्थगित हुने भएको छ ।

अन्तर्राष्ट्रिय वाङमय प्रतिष्ठानको आयोजनामा लण्डनमा डायस्पोरामा पारिजात विषयक गोष्ठी र पुरस्कार वितरणमा नेपाललाई प्रमुख अतिथिका रुपमा निम्त्याइएको थियो ।

पटकपटक मन्त्री भइसकेका र यसअघि पनि थुप्रैपटक बेलायत आएका नेपाललाई बेलायतले भिसा नदिएको उनले सामाजिक सन्जालबाट पुष्टि गरेका छन् ।

नेपालले भिसा नपाएपछि कार्यक्रम स्थगित गरिएको जानकारी प्रतिष्ठानका अध्यक्ष विकलचन्द्र आचार्यले दिए ।

उनले विहीबार एक विज्ञप्ति जारी गर्दै साहित्यकार नेपाललाई भिसा नदिँदा नेपाली डायस्पोरा विकासको प्रयासमा अपूरणीय क्षति भएको ठहर गरेका छन् । विज्ञप्तिमा नेपालजस्ता साहित्यकारलाई बिना रोकटोक भिसा दिन पनि बेलायतसित आग्रह गरिएको छ ।

प्रतिष्ठानले वार्षिक रुपमा विशेष समारोह आयोजना गर्ने गरेको छ । प्रतिष्ठानले यसअघि सन् २०१३ मा एकै चोटि ४ वटा किताब प्रकाशन गरेको थियो भने पूर्व सभासद शान्ता चौधरीलाई पुरस्कृत गरेको छ ।

गत वर्ष प्रतिष्ठानले कवि तुलसी दिवसको प्रमुख आथित्यमा विपी कोइरालाको शत वार्षिकी समारोह मनाएको थियो ।