लन्डन । बेलायतमा नेपाली समुदायको सबैभन्दा ठूलो इभेन्ट मानिने गोर्खा कप च्यारिटीमा केन्द्रित गर्दै सम्पन्न भएको छ । स्वदेशमा अकल्पनीय विपत्तिका बीच क्वीन्स् एभिन्यू मैदानमा आइतबार सम्पन्न १३ औं गोर्खा कप मनोरन्जन भन्दा पनि नेपालको महाभूकम्प पीडितका लागि सहयोग माग्दै समापन भएको हो । जताततै च्यारिटी स्टल थिए, मैदानमा स्वयंसेवकहरु आर्थिक सहयोगका लागि अनुनय गरिरहेका देखिन्थे ।
उक्त प्रतियोगितामा यसवर्ष नन भेट्रानतर्फ क्वीजिएस् ब्लुले ५ गोल गर्दै गोर्खा कप जितेको छ । रेडिङ यूनिटीले चार गोल सहित फष्ट रनरअपमा चित्त बुझाउनु पर्यो । विजेता टिमले गोर्खा कपसहित १५ सय पाउण्ड नगद, फष्ट रनर अपले एकहजार पाउण्ड नगद, ट्रफी र प्रमाणपत्र पाए ।
मिडिया सेक्रेटरी रोहित गुरुङका अनुसार, नन भेट्रान ३२ र भेट्रान ८ गरि ४० टिमले प्रतिष्पर्धा गरेको उक्त प्रतियोगितामा भेट्रानतर्फ केन्ट एफसीले तीन गोलसहित पहिलो र हङकङ ४० फष्ट रनरअप (शुन्य गोल) भएको छ । भेट्रान टिमबाट पहिलो हुनेले ७५० पाउण्ड र फष्ट रनर अप (दोश्रो) हुने टिमले ५०० पाउण्ड नगद र कप प्राप्त गरे । नन भेट्रान पहिलो पुरस्कार राशी १५०० पाउण्ड घान्द्रुकका चन्द्रमान गुरुङ र भेट्रानको ७५० पाउण्ड अस्मिता एसोसिएट्सका एलएन पाण्डेले प्रायोजन गरेका हुन् । त्यस्तै वेष्ट प्लेयर क्वीजिएस् ब्लुका मोहन राई र ५ गोल गर्दै वेष्ट स्कोरर भए सहारा फुटबल क्लवका ओनेर ।
खेल समापन समारोहमा प्रमुख अतिथी रसमोर मेयर डायन बिडफोर्ड, विशेष अतिथी लन्डनस्थित कार्यवहाक राजदूत तेजबहादुर क्षेत्री र आयोजक तमुधिं यूके अध्यक्ष रामचन्द्र (सुर्जे) गुरुङले विजेता टिम र खेलाडीहरुलाई पुरस्कार प्रदान गरे । मन्तव्यका क्रममा कार्यवहाक राजदूत क्षेत्रीले यस्ता खेलबाट स्थानीय समुदायबीच समायोजन र एकतामा बल पुग्ने जनाए । रसमोर मेयर बिडफोर्डले आफ्नो क्षेत्रमा यस्तो वृहत इभेन्ट भएकामा खुशी व्यक्त गरिन् ।
गोर्खा ब्रिगेड डान्स ग्रुपको खुकुरी डान्स र अल्डरसट आर्मी ग्यारिसनका चिफ अफ आर्मी स्टाफ प्याराजम्पर मेजर रुद्र शाहीको नेतृत्वमा प्यारासुट डिस्प्लो गोर्खा कपका मुख्य आकर्षण रहे । प्यारासुटबाट नेपाल, बेलायत र तमुधिंको झण्डा झारिएको थियो ।
आयोजक तमुधिं यूकेले गोर्खा कप सफल भएको जनाएको छ । गोर्खा कपको संयोजन क्या. पिताम्बर गुरुङले गरेका थिए ।
तस्विरः क्यानन गुरुङ
