२५५९ औं वुद्ध जयन्ती भूकम्प पीडितमा समर्पित

लन्डन । बेलायतमा आयोजित २५५९ औं वुद्ध जयन्ती भूकम्प पीडितमा समर्पित हुंदै सम्पन्न भएको छ । वृद्धिष्ट कम्युनिटी सेन्टर (बीसीसी) यूकेले सप्ताहन्त रेडिंगमा आयोजना गरेको बुद्ध जयन्ती समारोह भूकम्पबाट दिवंगत हुनेहरुको सम्झनामा प्रार्थना गर्दै सकियो । उक्त अवसरमा मौनधारणासहित शोक सन्तप्त परिवारजनमा समवेदना समेत प्रकट गरिएको छ । गकर रिम्पोचे समेत उपस्थित समारोहमा पूजासहित पीडितहरुका लागि आर्थिक संकलन भएको बीसीसी यूके अध्यक्ष काजी शेर्पाले जनाए । करिब एक हजार सहभागी उक्त समारोहबाट संकलित मध्ये करिब चारहजार पाउण्ड पीडितहरुका लागि पठाइने सहमति भएको छ ।

बीसीसीले औषधिसहित करिब तीन टन अत्यावश्यक सामान नेपाल पठाउने 
तयारी समेत गरेको छ । सेन्टरले बेलायतबाट हालै भूकम्प प्रभावित क्षेत्रमा गएका २१ डाक्टर, दुईजना इन्जिनियर र दुई जना प्रशासक गरि २५ जनाको हवाइ खर्च बेहोरेको थियो । चिकित्सकको उक्त टोलीलाई अल्डरसटस्थित गुम्बामा पूजा पाठ गरेर विदाइ गरिएको थियो ।