भ‍ूकम्प आउँदैछ भन्दै माइकिङ गर्ने २ पक्राउ

काठमाडौं। ठूलो भूकम्प आउने भएकाले घरमा नबस्न माइकिङ गरेर अपवाह फैलाउने २ जनालाई प्रहरीले पक्राउ गरेको छ। बिहीबार ठहिंटीबाट हिराबहादुर थापा र ललितपुरमा राजेन्द्र खड्गी पक्राउ परेका हुन् ।

काठमाडौं उपत्यकाको विभिन्न स्थानमा माइकिङ गर्दै ५ वजेदेखि ७ वजेसम्म घरमा नबस्नु भन्ने अपवाह फैलिएपछि घर फर्किसकेका भुकम्प प्रभावितहरु पुन खुल्ला स्थानमा फर्किन थालेका थिए । प्रहरी प्रधान कार्यालयमा माइकिङ सम्बन्धी जानकारी आएपछि प्रहरीले यस्ता ब्यक्ति खोज्ने क्रममा २ जना फेला परेका हुन् । खड्गीलाई पाटनका स्थानीय बासिन्दाले कुटपिट गरेका थिए। उनी चोरीको अभियोगमा पक्राउ परेका व्यक्ति हुन्।

माइकिङपछि प्रहरीलाई देशभरबाट फोन आएको थियो। भूकम्पबाट आतंकित भइ घर छाडेर हिडेका व्यक्तिको घरमा पस्ने नियतले यस्तो प्रचार गरेको हुनसक्ने प्रहरीको अनुमान छ। प्रहरीले सार्वजनिक सुरक्षा ऐनअनुसार कारवाही गर्ने जनाएको छ।