महाभूकम्पबाट मर्नेको संख्या ६८६ पुग्यो

काठमाण्डौं । शनिवार मध्यान्ह गएको ७ दशमलव ९ रेक्टर स्केलको महाभूकम्पका कारण हालसम्म मर्नेको संख्या ६८६ पुगेको गृह मन्त्रालयले जनाएको छ । मन्त्रालयले यो हताहती संख्याबारे अपडेट गर्ने काम भइरहेको जनाएको छ । काठमाडौं उपत्यकामा मात्रै ५ सय बढिको मृत्यु भइसकेको छ । प्रहरीका अनुसार काठमाडौंमा २५०, भक्तपुरमा १५० र ललितपुरमा १ सय बढिको मृत्यु भएको छ ।
मृतकको संख्या अझैं बढ्न सक्ने अनुमान गरिएको छ ।

लमजुङ केन्द्रविन्दु भएर गएको उक्त शक्तिशाली भूकम्पले धेरै धनजनको क्षति भएको अनुमान गरिएको छ । पूर्व विवरण आउन बांकी छ ।

इकान्तिपुरका अनुसार, भूकम्पमा परी काभ्रेमा ५४, धादिङमा ३५, मकवानपुरमा ९, ओखलढुंगामा १०, रामेछापमा ५, भोजपुरमा २, नुवाकोटमा ६, गोर्खामा १२ जनाको मृत्यु भएको प्रहरीले पुष्टी गरेको छ ।

राजधानीका विभिन्न अस्पताल अहिले भरिभराउ छन् । हजारौं घाइतेको राजधानीका विभिन्न अस्पताल भित्र र बाहिर सडकमै उपचार भइरहेको समाचार छ । त्रिवि शिक्षण अस्पतालमा इमर्जेन्सी प्रमुख प्रताप नारायण प्रसादका अनुसार अस्पतालमा ५० देखि ६५ शव छन् । तीनसय बढी घाइतेको त्यहां उपचार भइरहेको छ ।

भूकम्पका धक्का पटक पटक गरि १४ पटक गइसकेको जनाइएको छ । मानिसहरु त्रसित छन्, रुवावासी छ । फोन सम्पर्क सहज नभएकाले परिवारजनमा अन्यौलको स्थिति छ ।