जाजरकोटमा भूकम्प

काठमाडौं। जाजरकोटमा मंगलबार साँझ दुई वटा भूकम्प जाँदा मध्यपश्चिमका जिल्लाहरुमा त्रासको अवस्था सिर्जना भएको छ।

भूकम्प मापन केन्द्रले धिमी गाविसलाई केन्द्रविन्दु बनाएर साँझ ७ बजेर ४७ मिनेटमा ५ दशमलव १ म्याग्निच्युडको भूकम्प गएको बताएको छ । त्यसको करिब आधा घण्टापछि सो क्षेत्र नजिकै करिब ४ म्याग्निच्युडको भूकम्प गएको केन्द्रले जनाएको छ।

भूकम्पको धक्काले कारण कर्णाली, भेरी र राप्ती अञ्चलका विभिन्न स्थानमा धक्का महसुश गरिएको छ । भूकम्पपछि त्रासको वातावरण छाएको छ । मानिसहरु घरबाट बाहिर निस्किएका छन्। भूकम्पले क्षति पुरयाएको जानकारी कतैबाट आएको छैन । भूकम्पको केन्द्रविन्दु पृथ्वीको सतहभन्दा करिब ४० किलोमिटर गहिराइमा रहेको अमेरिकाको जओलोजिक सर्भेले जनाएको छ। भूकम्पको केन्द्रविन्दु राजधानी काठमाडौंबाट ३ सय १४ किलोमिटर पश्चिम उत्तरमा पर्छ।

युरोएशिया र इन्डियन प्लेटको फल्टलाइनमा पर्ने नेपाल भूकम्पको उच्च जोखिमयुक्त क्षेत्रमा पर्दछ।