अर्थशास्त्री नेपाल नयाँ गभर्नर

काठमाडौं। आकांक्षीको लामो सूची र चर्को लबिङलाई पछि पर्दै अर्थशास्त्री चिरञ्जिवी नेपाल नेपाल राष्ट्र बैंकको गभर्नर भएका छन्। बिहीबार मन्त्रिपरिषद बैठकले १६ औं गभर्नरका रूपमा नेपाललाई केन्द्रीय बैंकको नेतृत्व दिने निर्णय लिएको हो ।

गभर्नरका रूपमा युवराज खतिवडाको पदावधि सकिएकै दिन सरकारले आगामी ५ वर्षका लागि अर्थशास्त्री नेपाललाई गभर्नर बनाएको छ ।

अर्थमन्त्री रामशरण महत संयोजकत्वको सिफारिस समितिले बुधबार मात्र नेपालसहित डेपुटी गभर्नरद्वय गोपाल काफ्ले र महाप्रसाद अधिकारीको नाम सिफारिस गरेको थियो।

नवनियुक्त गभर्नर नेपाल यसअघि प्रधानमन्त्रीका आर्थिक सल्लाहकार थिए । उनले तत्कालीन अर्थमन्त्री शंकर कोइरालाको आर्थिक सल्लाहकार तथा विदेशमन्त्री सुजाता कोइरालाको सल्लाहकारका रूपमा समेत काम गरेका थिए । श्रम–सम्बन्ध (लेबर रिलेसन) मा विद्यावारिधि नेपालसँग धितोपत्र बोर्डलगायत विभिन्न निजी तथा सरकारी निकायमा नेतृत्वकारी कामका अनुभव छन् ।

पुर्खौली घर पाल्पा रहेका उनी राजनीतिक आस्थाले कांग्रेस निकट हुन् । उनी त्रिभुवन बहुमुखी क्याम्पस, तानसेनमा अध्ययन क्रममै नेपाल विद्यार्थी संघसँग आबद्ध भएर कांग्रेससँग नजिकिएका थिए ।