एमालेमा ८ वैकल्पिक सदस्य मनोनित

काठमाडौं। नेकपा एमालेले ८ जनालाई वैकल्पिक केन्द्रीय सदस्यमा नियुक्त गरेको छ । एमाले मुख्यालय बल्खुमा मंगलबार भएको स्थायी कमिटी बैठकले केन्द्रीय कमिटीले मनोनयन गर्न पाउने कोटाबाट ५ र अन्य राजनीतिक दलबाट एकीकरण गर्न आएकाबाट ३ जनालाई वैकल्पिक सदस्य नियुक्त गरेको हो ।

केन्द्रीय कमिटीको कोटाबाट झापाका खगेन्द्र चुडाल, रामेछापका देवशंकर पौडेल, कास्कीका मानबहादुर जिसी, काठमाडौंका रूपनारायण श्रेष्ठ र अछामका झपट रावल वैकल्पिक केन्द्रीय सदस्य बनेका हुन् । एकीकरणको काटोबाट प्रह्लाद गिरी, देउमान सम्बाहाम्फे र भाष्कर काफ्ले वैकल्पिक केन्द्रीय सदस्य बनेको महासचिव ईश्वर पोखरेलले जारी गरेको विज्ञप्तिमा उल्लेख छ ।

मंगलबार वैकल्पिक सदस्य मनोनित गरिएपछि एमाले केन्द्रीय कमिटी १ सय ८१ सदस्यीय बनेको छ ।