बिहीबार, कार्तिक ६ २०७७ | Thu, October 22, 2020
नेपालको समय: ०५:४४ | UK Time: 00:59

कांग्रेस महाधिवेशन भदौ अन्तिम साता, विपी जयन्तीको दिन उद्घाटन

वीनेपाली
२०७१ फागुन ६ गते १८:१९

काठमाडौं। नेपाली कांग्रेसको १३ औं महाधिवेशन आगामी भदौ २४ देखि २८ गतेसम्म काठमाडौंमा हुने भएको छ।

प्रधानमन्त्री निवास बालुवाटारमा बुधबार बसेको केन्द्रीय समिति बैठकले महाधिवेशनको मिति र कार्यतालिका तय गरेको हो। BP_smriti_bhawan_Nepali_congress

कांग्रेसले जननायक विश्वेश्ररप्रसाद कोइरालाको १०१ औं जन्मदिनको अवसर पारेर महाधिवेशन उद्घाटन गर्ने भएको छ। मंगलबार बसेको पदाधिकारी बैठकले भदौ १देखि ५ गतेसम्मको नाम प्रस्ताव गर्ने निर्णय गरेको थियो।

एकवर्षे कार्यकाल थपिएको पाँच महिनापछि महाधिवेशनको मिति निर्धारण गर्दै कांग्रेसले क्रियाशील सदस्यतासम्बन्धी विवाद, वडा, गाउँ, नगर, क्षेत्रीय र जिल्ला अधिवेशनको कार्यतालिका तय गरेको छ । एउटा तहको अधिवेशन एकै दिन हुने भएको छ । जसअनुसार वडा, गाउँ र नगरको अधिवेशन साउन १४ गते हुनेछ । २ सय ४० वटा निर्वाचन क्षेत्रको अधिवेशन साउन २२ गते र ७५ वटै जिल्लाको अधिवेशन साउन २६ गते हुनेछ । कांग्रेसले फागुन मसान्तभित्र क्रियाशील सदस्यता वितरण गरिसक्ने निर्णय गरेको छ । सदस्यता वितरणका लागि यसअघि चारपटक थप गरिएको मिति कांग्रेसले गुजारेको थियो ।

कांग्रेसले नवीकरण र नयाँ सदस्यता फारम फागुन मसान्तभित्र केन्द्रीय कार्यालय नपठाउने जिल्लालाई अधिवेशनमा सहभागी नगराउने पनि निर्णय गरेको छ। ‘नयाँ क्रियाशील सदस्यता र नवीकरण फारम आगामी फागुन मसान्तभित्र पार्टीको विधान, नियमावली र २०७१ असार २६ गतेको केन्द्रीय परिपत्रले निर्देशन गरेअनुरूप केन्द्रीय कार्यालयमा आइसक्नुपर्नेछ,’ बैठकपछि जारी विज्ञप्तिमा भनिएको छ, ‘२०७१ फागुन मसान्तभित्र शुल्कसहित क्रियाशील सदस्यता (नयाँ र नवीकरण) आवेदन फारम केन्द्रमा नबुझाउने जिल्लाले महाधिवेशनमा भाग लिन पाउने छैन ।’ केन्द्रको परिपत्रअनुसार प्रक्रिया पूरा नभएका क्रियाशील सदस्यता आवेदनले मान्यता नपाउने पनि बैठकले स्पष्ट पारेको छ ।

प्रतिक्रिया

सम्बन्धित सामाग्री

फेसबुक