ज्येष्ठ नागरिकलाई सवारीसाधनमा अाधा भाडा छुट

काठमाडौं । काठमाडौं जिल्ला प्रशासन कार्यालयले ज्येष्ठ नागरिकलाई सार्वजनिक सवारी साधनमा ५० प्रतिशत छुट दिने निर्णय कार्यान्वयन गराउने भएको छ ।
काठमाडौंमा सञ्चालित सबै सार्वजनिक सवारी साधनमा ज्येष्ठ नागरिकलाई ५० प्रतिशत छुट र दुईवटा सिटको आरक्षण कार्यान्वयन गराउन जिल्ला प्रशासन कार्यालय काठमाडौं तयार भएको हो ।
विगत दुई वर्षदेखि सार्वजनिक सवारी साधनमा ५० प्रतिशत भाडमा छुटको हुनुपर्ने माग गर्दै ज्येष्ठ नागरिकहरु मीनभवनस्थित यातायात व्यवस्था विभागमा धर्ना बस्दै आएका छन ।
सार्वजनिक सवारी साधनमा छुट दिने निर्णय व्यवाहारिक रुपमा कार्यान्वयन गराउन धर्नामा बस्दै आएका ज्येष्ठ नागरिकहरु शुक्रवार काठमाडौंका प्रमुख जिल्ला अधिकारीलाई ध्यानाकर्षण गराउन जिल्ला प्रशासन कार्यालय काठमाडौं पुगेका थिए ।
गत भदौमा महिला बालबालिका तथा समाज कल्याण मन्त्रालयले सबै सार्वजनिक सवारी साधनमा दुईवटा सिट र ज्येष्ठ नागरिकलाई ५० प्रतिशत भाडा छुट दिने निर्णय गरे पनि अहिलेसम्म कार्यान्यवन हुन सकेको छैन ।

प्रशासन कार्यालय पुगेका ज्येष्ठ नागकिलाई सम्बोधन गर्दै प्रमुख जिल्ला अधिकारी ऐकनारायण अर्यालले अब ज्येष्ठ नागरिकको माग केही हदसम्म पूरा भएकाले धर्ना बस्न नपर्ने बताए ।
ज्येष्ठ नागरिक संयुक्त संघर्ष समितिका अध्यक्ष महाप्रसाद पराजुलीले ज्येष्ठ नागरिकको माग अरु पनि बाँकी रहेकाले अहिले नै धर्ना अन्त्य नहुने बताए ।

काठमाडौंमा मात्र नभई देशैभरी सार्वजनिक सवारी साधनमा ज्येष्ठ नागरिकले छुट पाउनुपर्ने र हाल सरकारले ज्येष्ठ नागरिकलाई प्रदान गर्दै आएको मासिक पाँच सय सामाजिक सुरक्षा भत्ता तीन हजार रुपियाँ पुर्याउनुपर्ने र अस्पतालमा ज्येष्ठ नागरिकलाई ५० प्रतिशत छुट दिनुपर्ने ज्येष्ठ नागरिकहरुको माग छ।