प्रश्नावली समितिको विघटन वार्ताका लागि बटमलाइन: दाहाल

काठमाडौं। एकीकृत नेकपा माओवादीका अध्यक्ष पुष्पकमल दाहालले बहुमतीय प्रक्रियाबाट संविधान निर्माणका लागि गठन गरिएको प्रस्ताव निर्माण (प्रश्नावली)समिति विघटन सत्तारुढ दलसँग वार्ताको ‘बटमलाइन’ भएको बताएका छन्। ३० दलीय विपक्षी मोर्चाका संयोजकसमेत रहेका दाहालले समिति विघटन भए वार्ताको वातावरण बन्ने जिकिर गरे ।

उनले प्रश्नावली समितिलाई ‘बेकारको समिति’ को संज्ञा दिए। ‘कांग्रेस–एमालेलाई भनिसकेको छु, यो बेकारको समिति हो,’ शुक्रबार विराटनगरमा सञ्चारकर्मीसित कुरा गर्दै उनले भने, ‘जनतालाई हैरान बनाउने प्रश्नावली समिति विघटन गरौं वा निलम्बन गरौं।’

समिति खारेज नगरे सत्तारुढ दल कांग्रेस–एमालेका शीर्ष नेताले सार्वजनिक वक्तव्य निकालेर ‘शान्ति सम्झौता र १२ बुँदे सहमतिबाट टाढा जाँदैनौं’ भनेर प्रतिबद्धता जनाउनुपर्ने दाहालको माग छ । ‘यो दुईटा काम भयो भने वार्तामा बस्छौं,’ उनले भने, ‘हामीले हेर्दा सहमति टाढा छैन, कांग्रेस–एमालेका केही नेताले सहमति भाँडेका मात्र हुन् ।’

संविधानसभाबाट नभागेको बताउँदै उनले संविधानसभाबाटै संविधान बनाउनुपर्छ भनेर आफूहरुले बलिदानी गरेको बताए । उनले माघ ५ मै शासकीय स्वरुप र संघीयतामा मोटामोटी सहमति भइसकेको जानकारी दिँदै भने, ‘सहमति हुनै लागेको देखेर कांग्रेस–एमालेका केही नेता आत्तिए, प्रक्रियामा लगेर हामीलाई धकेल्ने र भित्तामा पुरयाउने प्रयास भएकै हो ।’