काठमाडौं। नेकपा–माओवादीले एकीकृत नेकपा (माओवादी) सँग एकताका लागि पहल गर्ने बताएको छ । जनयुद्ध, जनआन्दोलनकारी शक्तिको एकता जरुरी रहेको ठहर गर्दै सो पार्टीले परिवर्तनका एजेन्डा र मूल्य–मान्यता धरापमा परेको भन्दै पार्टी एकताको पहल गर्ने निर्णय गरेको छ । 
केन्द्रीय समितिको निर्णयबारे जानकारी दिन बिहीबार पार्टी केन्द्रीय कार्यालय बुद्धनगरमा आयोजित पत्रकार सम्मेलनमा माओवादी अध्यक्ष मोहन वैद्यले क्रान्तिकारी शक्तिबीच एकता प्रक्रिया सुरु भएको जानकारी दिए । संविधानसभाको दोस्रो निर्वाचनपछि परिवर्तनकारी शक्ति अल्पमतमा परेको निष्कर्ष निकाल्दै नेपाली कांग्रेस र नेकपा (एमाले) ले विगतको सहमति तथा सम्झौता लत्याएर एमाओवादीलगायत शक्तिलाई समेत बाहेक गरेकाले पार्टी एकता आवश्यक भएको वैद्यको भनाइ थियो ।
माओवादीले फागुन १ गतेदेखि चैत २४ गतसम्म मेची–महाकाली राष्ट्रिय अभियान सञ्चालन गर्ने जनाएको छ ।
