काठमाडौं। नेपालका विभिन्न शिविरमा रहेका मध्ये ८० हजार भुटानी शरणार्थी अमेरिका पुगेका छन्। भुटानले उनीहरुलाई स्वदेश फर्कन नदिएपछि तेस्रो देश पुनर्वास कार्यक्रमअन्तर्गत उनीहरुलाई अमेरिका लगिएको हो।
तस्विर: अमेरिकी दूतावास
पुनर्वास कार्यक्रमअन्तर्गत ८० हजार शरणार्थी अमेरिका पुगेको काठमाडौंस्थित अमेरिकी दूतावासले बुधबार जनाएको छ।
दूतावासका अनुसार अमेरिकी राजदूत पिटर डब्लु बोडीले ८० हजार पुरयाउने टोलीमा रहेका तीन व्यक्तिलाई त्रिभुवन अन्तर्राष्ट्रिय विमानस्थलमा बिदाइ गरेका थिए। उनीहरुले ओहायो राज्यमा बसोबास गर्ने छन्।
अमेरिकाले भुटानी शरणार्थीलाई सन् २००७ देखि पुनर्वास गराउन थालेको हो। सात वर्षअघि भुटानी शरणार्थीको पहिलो समूहले नेपालबाट प्रस्थान गरेयता ९३ हजारभन्दा बढीलाई अस्ट्रेलिया, क्यानडा, डेनमार्क, नेदरल्यान्ड्स, न्युजिल्यान्ड, नर्वे, बेलायत र अमेरिकामा पुनर्वास गरिसकिएको छ। अमेरिकामा पुनर्वास गराइएका ८० हजारमध्ये केही भुटानी अंगीकृत अमेरिकी नागरिक बनिसकेका छन्। अमेरिकाले नेपाल सरकार, शरणार्थीसम्बन्धी राष्ट्रसंघीय उच्चायुक्तको कार्यालय (युएनएचसिआर) तथा अन्तर्राष्ट्रिय आप्रवासी संगठन (आइओएम) सँगको समन्वयमा पूर्वी नेपालमा बसोबास गर्दै आएका पुनर्वास गरिदै आएको छ।
