काठमाडौं। जीप दुर्घटनामा गम्भिर घाइते भएका बाग्लुङ-१ का सभासद हरिबहादुर खड्काको आइतरबार साँझ निधन भएको छ। खड्काको ८:२० मा निधन भएको बताइएको छ। सभाषद खड्काको निधनको पुष्टी उनका भाञ्जा अर्जुन घिमिरेले गरेका छन् ।
खड्काको बाँसबारीस्थित न्युरो अस्पतालमा उपचार भइरहेको थियो। खड्का चढेको ग १ झ २२४ नम्बरको जीप बाग्लुङको भकुन्डे ९ स्थित गलुवामा बुधबार दुर्घटना भएको थियो।
प्रधानमन्त्री सुशील कोइरालाले उद्घाटन गर्ने बलेवा पैयुँपाटा बहुमुखी क्याम्पसले आयोजना गरेको धनधन्यञ्चल महायज्ञ उद्घाटन समारोहमा सहभागी हुन जाँदा उनी दुर्घटनामा परेका थिए। पल्टिएको जीपमा खड्का च्यापिएका थिए। खड्का ५१ वर्षका थिए ।
वाग्लुङ नगरपालिकामा २०२० साल जेठ १८ गते जन्मिएका खड्काले २०३६ सालबाट नेपाली कांग्रेसको गाउँ समिति मार्फत राजनीति सुरु गरेका हुन् । खड्काले नेपाली कांग्रेस वाग्लुङ नगर समितिको सभापति, क्षेत्रीय सदस्य हुँदै २०५४ सालमा नेपाल तरुण दलको जिल्ला अध्यक्ष बनेका थिए।
२०५८ सालमा तरुण दलको केन्द्रिय सदस्य भएका खड्का २०५२ सालदेखि २०६७ सालसम्म पार्टीको जिल्ला सदस्य, २०६७ सालदेखि नेपाली कांग्रेसको जिल्ला सचिव रहे ।
